綠葉羅浩銘台慶「不被邀請」 拍《風林火山》更開心：情願開工啦
《TVB 50周年華麗轉身邁步同行》（TVB50台慶）節目在星期日（11月19日）就已經完滿結束。全台100位藝員在台上又唱又跳實在是好不歡樂，睇嘅觀眾開心，出席嘅藝員又開心。台慶盛事，當然就每個幫TVB出過一份力的藝員都想出席。不過，可以出席的藝員位置就只得100個，鏡頭背後其實還有很多默默耕耘而又不被邀請的一群。《心理追兇 Mind Hunter》中飾演「羅祖」的羅浩銘就是其中之一。
羅浩銘由2011年起加入TVB到現在其實都已經差不多有7年。未上映的無綫新劇《特技人》中更試過因拍劇而受傷。「少事，吊威也整到，唔使入醫院，拍動作片緊有㗎啦。傷完之後仲要趕去《L風暴》開工。」雖然阿Ken樣貌形象未必如其他小生一樣，不過絕對算得上是實力派。除TVB劇集外，他還參與過不少的電影制作。《激戰》《迷城》中也有他的出現，《激戰》之中他更是彭宇晏的替身。
話明台慶就梗係全台同樂，不過阿Ken對於「不被邀請」出席台慶這件事又似乎睇得好「化」。羅浩銘接受《香港01》訪問時說：「我自己嚟講冇乜感覺，唔去咪唔去台慶囉，冇乜所謂。我又唔係極度十分之好想去。咁你有需要我嘅專長咪幫你表演囉，其實我都有幫佢表演咗2年。因為我又唔多靚衫，同埋第二我真係要開工嘅，咁你俾我揀我情願開工唔去台慶啦。」
這邊廂台慶「不被邀請」，那邊廂阿Ken就幫Juno新戲中其中一個角色（睇張相就知唔係2打6）。「我又唔係好期待十分之極度想去，因為我又唔多靚衫，同埋第二我真係要開工嘅，咁你俾我揀我情願開工唔去台慶啦。不過我係唔係親生仔同我有冇得去呢，我諗就冇關係嘅。佢哋真係冇需要你去，咪冇去囉。阿Ken我唔care㗎。你唔叫我，我都唔係好想著件靚衫上去跳舞，我真係唔想。Juno嗰套《風林火山》我個角色係咩呢，我就唔可以太detail同你講。但係我可以講呢套戲入面每個演員，角色大與小都好特別。因為成個世界觀都扭曲哂，個個都好特別，都幾破格。佢又好認真啦，又好大制作，導演又好好，好肯同你溝通。」
訪問中羅浩銘都有解釋道：「話不被邀請其實係我講笑唧。佢今年冇叫我去，係佢唔使我表演吖嘛。咁我又唔係唱歌跳舞嘅材料，上年我有幫佢打功夫，咁今年佢唔使人打功夫咪唔叫我去囉。始終我呢類型演員唔係太適合唱歌跳舞，佢今年係50個靚仔靚女唱歌跳舞。咁佢覺得今年羅浩銘唔適合，話唔定出年51週年主題係打功夫嘅，佢會叫返我去呢。」
「我望住佢哋個個著靚衫跳舞，問自己係咪想好似佢哋：我唔係，我係嚟拍電影拍電視劇，我係做演員做好我本份，我拍啲嘢觀眾鍾意睇咪得囉，唔使去你嗰啲生日會㗎。」嗱，呢啲咪叫型囉。