【TVB台慶50周年】高海寧稱封胸唔關禁色令：吓吓攞出嚟我都厭

一年一度的TVB台慶又到啦，今年更加是TVB 50歲，著得靚一靚賀台慶是常識吧。有鑑於之前樂易玲發出的「禁色令」，所以今年台慶都有不少藝員乖乖地「收返起個胸」，連一向性感開嘅高海寧都密實地出席。不過高海寧話有「收起性感」呢個主意已經好耐。

「件衫係stylist今朝先俾我試，不過我有一個要求就係所有衫都唔要性感，你見我之前節目巡禮都係著西裝。我唔係太想好似以前咁。其實我性格好男仔頭，我想做返自己，舒服啲。」

即係高海寧以前的性感形象是違背自己的意思和不舒服？高海寧回答説：「梗係啦，你試下著到好性感企定定咁影相。我而家行路又快又輕鬆，仲點行都得。（旅遊節目呢？）你睇我在《森美旅行團》有冇性感過？我浸溫泉嘅時候一條『線頭』（事業線）都冇俾你睇過。」

高海寧更表示以後會改變性感形象。「我以後唔會再性感，有啲嘢唔使下下攞出嚟，你唔厭我都厭啦。但係我唔會封晒自己條路，不過so far我不會太性感。（連自己Facebook、Instagran都冇？）唔會有㗎啦，你識我咁耐都知我唔會post性感相。」睇嚟以後就真係「往事只能回味」啦，想睇就淨係可以搵舊相舊片啦。