【TVB台慶50周年】薛家燕金碧輝煌再「登基」　守禁色令密實上陣

來到無綫50周年盛事《萬千星輝賀台慶》，全台藝員自然要傾巢而出同公司賀壽啦。而在節目開始前，就齊齊行個紅地毯熱下身先。雖然TVB日前已經頒布了「禁色令」，不過仍有不少女藝人無視禁令，繼續性感上陣。當然亦有部分好乖好聽話的女藝人願意收起性感，打扮密實見人，家燕姐薛家燕就是其中一位喇。不過其實家燕姐都不是走開性感路線，禁不禁色對她似乎影響不大，最緊要不是禁「登基」就得啦，著到好似登基咁隆重先係家燕姐Style嘛！

家燕姐今晚就穿了一件好華麗的晚裝再度「登基」喇，家燕姐說：「今日著得金碧輝煌啲啦，因為今日喺TVB嘅50周年台慶啦。公司話唔好著咁暴露啦，咁我呢件衫好雍容華貴，但又唔會暴露，好似皇后登基咁啦，所以保持返嗰個狀態。咁點解唔著黃色呢？因為我係屬於綠組嘅，佢哋話要有啲綠色嘅，所以我就配戴埋啲翡翠嚟啦。應該都好貴㗎，五百零萬啦，不過唔係我嘅，係借人哋嘅。」

原來家燕姐都為了響應公司的「禁色令」而刻意不打扮性感：「本來呢我就準備咗一件歐洲嘅衫，大家都知啦今年歐洲嘅衫係比較性感啲嘅，咁不如換過第二套啦，所以我係尋日即刻換過呢一套嘅。好彩我平時都準備咗啲登基嘅衫啫。」家燕姐好funny呀！

她為了包實自己，仲搞到好趕急：「好趕呀，尋晚趕到半夜先趕起呢件衫出嚟呀。唔好咁急通知囉，等我哋可以有所準備吖嘛，咁都無乜問題嘅，不過我著嘅晚裝其實都唔係咁性感嘅，因為我比較肥同埋豐滿啲，啲人先會覺得我性感啫，都OK嘅。呢件衫都係訂造㗎，立即漏夜趕工㗎。我諗公司呢個指引一定係有意義喺入面嘅，都好嘅，可能驚著得太過暴露會唔好睇啦，我哋尊重公司嘅意見，所以我都特別趕製咗呢件衫，其實無咩問題嘅。」