【再親我好媽】拍得4集點夠喉？　何廣沛：我同江嘉敏會繼續拍拖

《親親我好媽》在多齣講求大堆頭、大製作的台慶劇之中，無疑屬於小本經營，刀仔鋸大樹之作，卻由於講述怪獸家長的題材夠貼地，意外地甚受歡迎，全劇平均收視28點，最高收視更達31點，而且劇中飾演學生情侶的何廣沛及江嘉敏這一對更率先跑出，成為了最襯CP，結局時二人因為各自的理想而要Long D，明顯留下伏線拍續集。

近日何廣沛和劇中的虎媽江美儀不約而同在Instagram上載了《再親我好嗎》的劇本，睇個劇名都知跟《親親我好媽》有關係，不少網民更估計是開拍續集，但何廣沛和江美儀又分別遮掉了劇名前的位置，留下了一大疑團，更有網民估計遮着了網劇的字眼。劇中演員何廣沛接受《香港01》訪問，他笑稱大家捉錯用神，「遮住嘅地方係贊助商嘅名嚟，唔出得住嘅，而呢套的確唔係正劇嚟嘅，係一啲短劇，總共有4集，每集半小時。」

何廣沛表示今次是綜藝科操刀，所以不會用回劇集方面的幕後人員，而且《親親我好媽》的監製關永忠亦已離巢，走馬上任的是綜藝科的監製李志倫，「用咗《親親我好媽》的人物關係，有少少伸延，故事嘅時空係大結局，即係我同江嘉敏中學畢業之後，當然我哋會繼續有愛情線，4集裡面我自己會拍第2集，其中一集會拍陳敏之同韋家雄嗰邊。我未知會放喺邊度播，但唔可以當外傳睇，當時套劇播嘅時候，觀眾睇得唔夠喉，依家多少少嘢睇，補返少少留白嘅地方。」

究竟劇中何廣沛和江嘉敏能否有情人終成眷屬呢？何廣沛笑言：「依家先開咗一日工，講我哋拍拖就梗架啦，但去到邊個程度就賣個關子，我哋正劇嘅時候已經一齊咗架嘛。我知道好多觀眾想睇呢個劇，好鍾意我同江嘉敏呢一對，呢個係開心事嚟嘅，短短4集嘅短劇希望可以滿足到觀眾嘅期望啦。」雖然不是《親親我好媽》的續集，但何廣沛表示上載了一張劇本相，在Ig的留言已經　超過以前他的其他Post，令他喜出望外，觀眾想睇《親親》續集，就要多點留言，推到開續集啦。