【親親我好媽】何廣沛勁冧江嘉敏　最佳CP想繼續：佢笑容好sweet

無綫劇《親親我好媽》雖然已經大結局，但劇中一對最佳CP何廣沛及江嘉敏，戀情只是簡單的以Long D告終，留下了許多懸念，到喉唔到肺。網民對「亮瑜戀」顯得依依不捨，希望他們有一個美麗的結局，紛紛在網上留言「開拍續集啦」、「好掛住佢哋」、「乜套劇咁短？」，觀眾投入程度可說是近年無綫劇集中相當罕見。

其實何廣沛跟江嘉敏外形上確是天生一對，男的俊朗有型，女仔亦清純俏麗，不少觀眾將自己代入其中，緬懷讀書時代的青澀戀情。何廣沛接受《香港01》訪問，知悉網民支持開拍續集，他表現得甚為高興雀躍，「我梗係想開續集啦，始終我哋個故事未完，依家係long d啦，啱啱完咗中學，如果真係拍續集，我覺得有得諗㗎，講吓大學呀，好多嘢可以講，熊子逸佢哋又中學呢。」

對於觀眾不捨得二人分隔兩地，希望二人可以大團圓結局，何廣沛表示：「好開心大家咁想睇落去，我同江嘉敏戀情啱啱開始咗，重心又去咗講其他嘢，有少少吊大家癮嘅。15集之後我嘅戲分少咗好多，大家諗住16集之後會講吓我哋拍拖，但跟住又去咗講媽媽嘅嘢，對觀眾真係唔好意思。」

何廣沛繼《親親我好媽》後，正忙於拍攝《天命》及《超時空男臣》，忙得喘不過氣，但提起拍檔江嘉敏，何廣沛語氣仍然是甜絲絲，「其實佢真人同劇嘅角色好大出入，角色係比較乖，班長嚟㗎嘛。佢其實好活潑，真人好可愛，喺片場同啲工作人員都打成一片，有佢喺度拍攝場口都歡樂好多，氹到大家都嘻嘻哈哈，佢係開心果嚟嘅。」(你自己對她的感覺呢？)「拍劇就唔多唔少都會投入感情嘅，我覺得佢嘅笑容好燦爛，好sweet。其實佢戲分多過我，但佢好捱得，日以繼夜咁拍，而且轉數快，適應能力好強，呢啲我都好欣賞佢。」

二人會否戲假情真，至今仍言之尚早，但何廣沛卻笑言可以情侶檔吸金，「都要睇吓商戶搵唔搵我哋，同埋公司點樣安排。或者搵我哋拍套微電影都好吖，甚至拍MV都可以，等我哋可以有少少延續都好，亦俾觀眾睇到我同江嘉敏嘅合作。」何廣沛希望能跟江嘉敏有下文，至於江嘉敏近日在Instagram上載拍攝《都市閒情》的花絮，看來新工作仍未有着落，既然網民如此喜歡何廣沛和江嘉敏這一對，無綫不妨考慮讓他們繼續合作，滿足觀眾的幻想空間。