【親親我好媽】江美儀自豪幫無綫洗膠劇味：幫公司爭番啖氣！

無綫劇《親親我好媽》，內容講述虎媽江美儀如何培養兩個女兒成才，情節被網民大讚夠寫實貼地，完完全全講中了一班媽媽的心聲，而且該劇更率先彈出了美儀大女江嘉敏，網民大讚她夠pure夠鄰家女孩，而細女熊子逸的辛酸身世，亦令網民流過不少同情眼淚。觀眾眼睛是雪亮的，又怎會少得《親》劇最大功臣江美儀，網民大讚她演技出色，絕對有力問鼎今年頒獎禮的視后寶座。

《親親我好媽》未播出前，曾傳出不少是非，首先是傳出江美儀提出改劇本，更因而驚動高層，而要停廠4日執靚劇本。其後米雪跟江美儀演母女，又被指真實年齡有落差。劇集播出前根本不被看好，想不到播出後，越戰越勇，收視口碑雙雙報捷外，江美儀更成為一眾媽媽級觀眾的偶像，對於未婚及未有小朋友的江美儀，絕對是始料未及。

對於被網民盛讚好戲，有力問鼎頒獎禮視后寶座，江美儀接受《香港01》記者訪問，她先是多謝網民抬舉，其後表示：「去到年尾咁耐，驚唔記得喎。而且之後仲有咁多劇，可以之後有啲更厲害嘅，當然若果真係攞到(視后)梗係開心，就算冇，網民咁讚我，都夠我回味啦。」江美儀語氣相當興奮，還說今次能夠開個好頭都好開心，「幫公司爭番啖氣，唔好成日俾人鬧膠劇，今次省靚個招牌。」其實對於近年無綫重用有線幫，江美儀不止為公司省招牌，更為一班從亞視過檔的舊戰友，打了一支強心針。

8時半的《親親我好媽》走勢凌厲，相反跟住9時半的《迷》，收視卻未如理想，兩劇的女主角，分別是同樣由亞視過檔的江美儀及田蕊妮，難免被人用來比較一番，更說阿田根本無資格贏視后，美儀才是實至名歸。江美儀笑着說：「唔好比較啦，大家都係好朋友，佢都好努力去做。記得有年佢贏視后，我贏最佳女配角，一齊企喺台上面，大家都好開心呀。依家啲電影頒獎禮都興雙影后，或者今次雙視后都得㗎。」

美儀說的正是2013年無綫台慶頒獎禮，阿田憑《巨輪》的姚文英一角，贏得視后及最受歡迎電視女角色。至於江美儀則憑《衝上雲霄II》的方芮嘉一角，贏得最佳女配角。想不到4年後，二人已是同場較技的對手，甚至江美儀的獲獎呼聲比阿田更加高。現時美儀開口閉口為公司爭口氣，但提起有網民話她撇掉了亞視味，她卻靜默了幾秒，「亞視都冇咗啦，梗係冇咗亞視嘅感覺。」誠然過檔無綫等於是新的開始，又何必再提那些回憶。