【名模Secret】陳嘉容少吃多運動：想行騷無5呎9吋唔使諗　　　

世上存在一個永恆不變的現象，就是總有不少女生夢想做model，踏上天橋演繹最時尚的新裝，到底天橋上的風光是否真的如此吸引？天橋下又有甚麼鮮為人知的辛酸？本地星級名模陳嘉容 （Eunis）就大爆模界Secret，讓各位一心想做model的女生更加了解這一行。那麼要怎樣才有機會做model踏上天橋行騷呢？Eunis表示：「最少都要有5呎9吋高，無5呎9吋唔好諗喇。」原來想做專業的行騷model門檻要咁高，換句話說即是天生的啦，身高未達標的唯有放棄吧。但大家又不用這麼灰心，Eunis話：「咁做唔到行騷model，都可以做硬照或者廣告model嘅。」

Eunis透露本地model的薪酬：「影editorial即係報紙、時裝雜誌嗰啲嘅價錢係$800-$1000影4個鐘連化妝set頭，呢個價係咁多年都無加過，無論係初入行定名模個價都一樣，有啲得$500都有，咁如果本時裝雜誌係好出名嘅你影唔影吖？拍廣告就係最多錢嘅，以時薪計，新入行都有$1000-$1500一個鐘，出名嘅model就以job計，香港嘅廣告都有幾十萬，如果大陸嘅話就幾百萬人民幣都有，咁如果係國際超模就有7位數字美金添。至於fashion show方面，初入行喺香港行騷嘅model一般收$2000-$3000一個job，top model嘅話就幾萬蚊。不過行騷嘅工作時間好長，要早幾個鐘去綵排同化妝set頭做準備，好多時都做成7、8個鐘，甚至十幾個鐘㗎。」