【反黑】導演宋本中慶功宴暗示下季有謝天華？「會見到㗎喇！」
深受劇迷喜愛的4K網劇《反黑》成績理想，截至現在內地的點擊率已達13.8億，而YouTube的點擊率則有2千8百萬。在該劇播出大結局的一晚，劇組就舉行了慶功宴，導演宋本中帶埋龍頭棍出來主持大局，並正式宣布將會開拍第二季和第三季。
至於大家都很關心的新一季演員陣容，到底是否真的會有鄭伊健、謝天華、黃秋生以及張耀揚等，導演就表示：「總之第二季會有重磅演員加入，係邊個就未公布得住，我哋其實已經諗定3季嘅概念，所以唔可以咁快用晒啲演員，要慢慢加入。我只可以講網上流傳嗰啲演員陣容有大部份都會參演。我哋呢套劇係向90年代嘅黑社會電影致敬，當然會加入一啲《古惑仔》電影系列嘅經典角色啦，大家拭目以待。」而編劇鍾盛遠就透露下季大sir房就會有一個很有份量的角色進駐。
對於有傳一些在第一季死去的角色，會在第二季復活，宋導演說：「我哋會將一啲好受歡迎嘅角色重現，無話係復活呀，我哋會有好合理嘅解釋點解佢哋無死到嘅。」編劇就大爆：「下季B1-1組會有一個隊員變節，係邊個同點解就梗係唔講得啦。」又有傳話謝天華已表示不會演出該劇的第二季，一直不肯透露下季全新演員陣容的宋導演，聞言即表示：「有佢呀，我哋係好想佢加入，其實第一季已經有搵佢，不過未出現到，第二季大家會見到㗎喇。（即係謝天華落實咗會演？）都係等官方公布啦，我唔講得住。下季預計出年1月開拍，開拍前就會公布晒所有嘢，大概喺聖誕節，就當係聖誕禮物啦。」
至於第二季的製作費有多少，宋導演表示要視乎劇本，李燦琛就笑言最好有10億。提到這部中資劇被指踩英國政府，導演否認說：「無踩，係以前無人講啫，係歷史事實嚟，無諗過任何政治元素，純粹係一份情懷。我哋係戲劇嚟，已經講明如有雷同，實屬虛構，今季係完整嘅30集故事嚟，第二季會有新主題。」他又為該劇突然宣布要下架解畫：「係為咗提升節目質素，將會變成2.0版本再播放，都係免費嘅，日期就未知幾時，等官方公布。」
他直言沒有想過該劇會有這麼好的成績：「適逢今年係反黑組成立60周年，別具意義。真係無諗過反應會咁好，全球4k播放得我哋做到，好巴閉，連google同youtube都嚟請教我係點樣可以做到嘅，完全係意想不到。嚟緊我哋都想加韓文同日文字幕，等多啲人可以睇到。警匪片係亞洲獨有嘅，我細個就有睇，好多正能量，講情與義。我哋套劇無特技，但贏在有情，一份港式嘅人情味，我哋要團結，大家係一家人，一齊體現獅子山精神。」