【反黑】播完大結局24小時內下架 未追曬點算好？
網劇《反黑》成功掀起一股追劇熱潮，前後共30集本來喺22號凌晨就會上載大結局，點知喺21號晚11點劇組於FACEBOOK官網出圖，表示「《反黑》是日停播」，滿心期待擔定櫈仔等睇大結局嘅網友們大表不滿。其後宣佈大結局會改喺10月22號晚8點播出，但播出後24小時即系23號晚上8點，將會全線喺YOUTUBE下架﹗唔系掛，未追曬點算好呀﹗
耗資6000萬成本拍攝，雲集多位香港實力派演員參與演出嘅《反黑》，由一開始網上免費開放俾全球觀眾收看，已經令人嘖嘖稱奇，即使YOUTUBE可以根據點擊分紅，但亦無可能因此而回本。原本於10月22號凌晨12點大結局，播放前一小時劇組宣佈是日停播，令網友深感不滿，直斥是「很差的宣傳點子，很不尊重觀眾的決定。」。其後證實因為想雲集演員慶功，兼一齊收睇大結局，所以先忽然作出停播決定。
其後劇組於Facebook上載一段重新配音的短片，講述當日上載youtube免費播放，希望更多人看到劇組的心血，但他們始終要面對成本壓力，宣佈10月23日晚上8點，即大結局播出後將與大家暫別。暫別即系咩意思？直至張建聲轉載留言先知：「第三十集播出後24小時內亦會全線下架，要計準時間追進度喔﹗」唔系掛，下架﹗30集每集大約一小時，如果未睇嘅朋友呢一刻開始，唔瞓覺唔去洗手間留喺屋企一直睇一直睇，都緊緊趕得切可以煲曬全劇，再遲d就……
暫別留言一齣，大多數網友表示理解要顧及成本，即使將來要付費重温，或推出DVD，一套好劇亦絕對願意支持，不過暫時未見劇組宣佈重温方法，亦不滿片商太遲宣佈下架決定，正在追劇的觀眾都紛紛留言表示：「唔系掛仲有十幾集未睇噃﹗」官方只系話將會喺Youtube下架，大家以為可以到內地官網睇番？記者去到優酷《反黑》網頁，的確見到30集齊曬，不過按入去就顯示無呢個頁面。咁即系……想追嘅朋友趁最後三十小時拿拿聲睇啦﹗
