【星和無綫電視大獎】黎耀祥薛家燕奪25週年獎 感嘆過去辛酸經歷
撰文：黃梓恒
出版：更新：
《星和無綫電視大獎2017》嘅致敬大獎，「25週年最受歡迎TVB電視男藝人」由黎耀祥奪得，他說：「大獎呢個名同我演藝身涯一樣咁長呀，哈哈，正如我頭先講，一個有年期嘅獎特別有意義。咁多年我最深刻嘅角色真係好多，例如西游記喇，近年嘅柴九同劉醒，同埋處境劇，好多好多難忘嘅回憶。最難忘捱得最辛苦緊係豬八戒，又要化妝又要頂住個肚喺大熱天時出外境，套劇其實個個都好辛苦。柴九係另一樣嘢，我人生嘅轉捩點，所以一樣都係咁難忘。」
至於女角色則由薛家燕奪得：「真係好大嘅感觸，當年入《真情》之前我係真係好徬徨，好多謝珍姐佢哋邀請，得到好姨呢個角色，都要多謝監制同編劇，你估唔到呢個角色可以深入民心，大家都咁喜愛。前幾日我坐飛機見到一班星加坡朋友，佢哋都仲係叫我做好姨，真係好似一幕幕重現喺我眼前，由呢個角色令我喺低谷企返起身，到而家兒女事業有成，真係好大嘅感觸，真係要多謝TVB，同埋大家嘅支持，無你哋嘅支持唔會有今日嘅我。」