【星和無綫電視大獎】李佳芯奪我最愛TVB女主角　爆冷贏胡定欣

《星和無綫電視大獎2017》最後終於去到最尾喇，李佳芯(Ali)竟然爆冷稱后，奪得「我最愛TVB女主角」。要知道在《踩過界》中，同劇的蔡思貝和朱千雪比她更有迴響，估唔到咁嘅情況下都俾Ali突圍而出，仲撼贏氣勢大好的胡定欣，唔怪得咁多觀眾都大跌眼鏡。在接受後台訪問時她說：「一開頭仲以為係頒錯獎，到而家我仲係未接受到呢個事實，但係見到每一個《踩過界》嘅同事拎獎，我仲喊得勁過自己拎，因為睇住大家由同事變為好朋友，所以真係好感動。」

不過其實都唔需要覺得太過唔公平，始終Ali今年的演技的確大有進步，而且不時被網民封為女神，又讚佢好女朋友，又讚佢靚，的確得到不少民心。在今年的兩套劇中，《與諜同謀》和《踩過界》都十分惹人注目，在上年更加獲得《萬千星輝頒獎典禮2016》飛躍進步女藝員，可見TVB十分寵愛兼看重她，今次在星和奪得視后，難道意味今年年尾的萬千星輝頒獎禮會再下一城？因為她還有一套《誇世代》做女主角，絕對唔係無可能。