麥明詩搭的士免找6毫都被司機放上網 十優港姐：一搭就出事
撰文：溫菁莉
出版：更新：
近年有唔少人都會在網上分享搭的士嘅奇遇，往往都離不開拒載呢嗰原因。今日下午有位的士司機就將今日遇到乘客嘅「趣聞」寫在《的士司機資訊網Taxi》內，「1440 接載『麥X詩』由尖沙咀加拿分道近加拿分廣場去佐敦漾日居，全程車資$44.40。你比$100我找番$55.60比你，係你話唔要$0.60散子。特此聲明！」事後麥明詩接受《香港01》電話訪問時就話好無奈，「我係唔係做錯事？ 」
麥明詩透露今日需要到尖沙咀拍劇，因為怕難泊車所以才會搭的士到現場。對於今次被的士司機公審，她在facebook亦話躺着也中槍，「其實呢，用電子收費大家咪唔洗煩囉～#十年唔搭一次的士 #一搭就出事。」問到今次唔收六毫子引起嘅風波，之後搭的士會唔會選擇收返呢？佢就話，「只是為了方便大家先唔收六毫子，其實有些的士司機都好好嘅，佢會少收你幾毫子收齊頭數嘅，我覺得大家就盡量均真啲好，自己都盡量唔會欠咗人地。」另外，麥明詩亦特別提到希望香港可以盡快推行電子收費，「其實而家搭的士仲要找零錢真係有啲唔方便，因為之前我係內地工作搭的士可以用電子銀行俾錢係好方便。」
問到早前有不少藝人都會在網上分享自己搭的士嘅奇遇，有時候都會被網友指係網絡公審，麥明詩就認為，「有時候都係想諷刺下時弊，係要俾大家討論下！」相隔1小時，該名的士司機就在《的士司機資訊網Taxi》刪除文章，而麥明詩亦在facebook內移除了post。