【後生仔傾吓偈】無家底難有氣質?　麥明詩:去外國讀哲學通常唔憂

日前播出的一集【後生仔傾下偈】主題是講校園風頭疐，這集依然是少了馮盈盈呢位主持，繼續由麥明詩 (Louisa) 和陸浩明兩個擔大旗，而Louisa亦不負眾望大爆金句，成功為該節目製造了話題。究竟家底是否會影響一個人的氣質？相信觀眾看完今集都不禁會有這個疑問。事源是大家正在討論選校花校草的評審準則，有人提問會否看家底，當大家聽到後都表現嘩然，覺得怎麼會看家底，此時Louisa就發表了她的個人見解和分析，而她口中所講的背景同環境就即是指家底。

Louisa表示：「坦白講，你唔會話真係睇家底，但係有時始終人係會被佢嘅成長背景所影響㗎嘛，如果個背景係比較好，他出來又好似係有氣質啲。咁當然有啲好有錢嘅都好無氣質啦，土豪式呀。但有時屋企無嗰種環境，又好難有嗰種氣質。例如你諗下如果佢屋企無乜環境，佢唔會出到嚟識講哲學㗎嘛。我覺得通常去得外國讀得歷史、古典、哲學嗰啲，通常屋企都唔憂米嘅，如果係憂米嘅就會讀醫、經濟、商業、會計、律師呢啲賺錢嘅科目。」又好似講得幾啱幾有道理喎，但唔知Louisa呢一番言論，會否令一班被指屋企憂米而選讀賺錢科目的學生嬲嬲豬呢？不過Louisa自己都是修讀法律，她也不介意標籤埋自己，所以大家都唔使咁敏感啦。

為免大家可能會誤會了Louisa所講的意思，《香港01》記者就電話訪問了她再講得詳細一些：「我唔係話有家底嘅人先會有氣質，我意思係話如果屋企環境好啲，會容易啲培養出一種氣質係對非物質嘅追求，例如知識、藝術等。教育其實係奢侈嘅嘢嚟，要有能力嘅家庭環境先可以support得到，要屋企無經濟同生活壓力，先可以畀你去追求精神上嘅嘢，而唔係只係為咗生活。當然我講嘅氣質唔係話要用錢堆砌出嚟，但如果屋企環境唔好，有經濟壓力，就好難有空間去畀你追求一啲生活以外嘅嘢。」

那麼Louisa又可有認識一些家境唔好卻仍然培養出氣質的人呢？「我自己同周圍認識的人都係屬於好彩嘅一群，讀女拔萃嘅人個個家庭環境都差唔多。」對於她表示屋企憂米的人就會修讀一些賺錢的科目，而她也是修讀法律的，家底唔錯的她坦言自己其實是憂米的：「呢樣係講心態，我心態上憂，都係一個打工仔，都要顧及生活，需要工作去支持生活。」