【國際小姐】王詠珩拍短片做過「野蠻港女」：我平時會嗲人
今屆港姐雷莊𠒇（Juliette）劣評如潮，大家注意力都轉移到國際小姐身上，其中香港代表王詠珩（Wing）旋即成為網紅，23歲嘅Wing係兼職模特兒，言行大方得體。
雖然未有任何拍戲經驗，但好多人都唔知原來佢拍過短劇仲飾演巴喳女友，搶男友杯麵兼當街扭耳仔，不過Wing接受訪問時就話真實嘅自己唔係咁，而係小鳥依人喎！
現年23歲的王詠珩，身高有1.76cm，行出嚟都有台型過人，Wing拍過唔少廣告，亦做過黃劍文《我們的》MV女主角，但實則演戲經驗比較少，但仔細搜尋一下，原來Wing早前拍過兩套搞笑短片，都係飾演野蠻女友，同佢選美形象有好大出入。
Wing為「港乜嘢」facebook專頁拍過兩段喜劇，一段喺中環碼頭外，飾演男友嘅「幸福毒男晒冷」想當街嘴咀Wing，她初初都好配合作狀貼近男主角，但到緊張一刻Wing突然封嘴：「我哋都係刷咗牙先啦！」就轉身走開；鏡頭一轉Wing同男友喺便利店食杯麵，Wing個杯麵太辣，即刻搶走男友嗰碗交換，都幾蠱惑。
另一個故仔更加港女，Wing發現男友手機like其他靚女，即搶走電話變晒老牛聲狂鬧：「我最近up咗咁多相，又唔見你like下我啲相，你想死呀？」講完仲扭男友耳仔，好恐怖呀！
王詠珩喺電話回應時講起呢兩段片即哈哈大笑，話係第一次幫朋友拍搞笑片，問佢點解最終冇嘴戲，佢話係為咗身邊人：「暫時介意拍錫戲呀！未放得低呢條線，唔想做影響身邊人唔開心。（係咪男友？）唔只男友，仲有爹哋，爹哋唔鍾意㗎，有時會話我：『著到咁』。」
Wing又強調平時唔係野蠻女友：「平時嘅我係小鳥依人，會嗲男友，又會嗲爸爸媽咪，但唔係煩嗰隻，我突然又可以好率直㗎！」佢話因為短劇比較搞笑，所以用比較誇張嘅方法去演，但佢自問演技唔好，希望日後有機會拍多啲。
講到Wing嘅男朋友，佢話傳媒稱佢為金融才俊其實唔係好啱：「佢只係打份工，又唔係金融界。」其實佢唔太清楚男友工作喎！至於相處方面原來曾經嗌大交，經過磨合期之後而家又回復熱戀期，所以唔會做野蠻女友囉