【國際小姐】純港女王詠珩瑪利曼畢業 代表香港出戰：想國際性啲
港姐告一段落，雷莊𠒇（Juliette）盡失民心，有網民就搵返代表澳門選國際小姐嘅Sofia出嚟比較，其實在這個由「澳門選美連盟」舉辨的活動上，仲有一位香港代表－－王詠珩（Wing Wong），都會在11月去到東京Tokyo Dome City Hall，與超過70位來自世界各地的冠軍級人馬角逐后冠。
其實以往香港代表都係由香港小姐做代表，但TVB在2015年開始唔玩，轉由澳門選美連盟負責選出香港的靚女參賽，話晒國際小姐是全球三大選美盛事之一，王詠珩有港姐都唔選，一選就選個最勁嘅比賽，確係明智。今年23歲的她於名校瑪利曼中學畢業後，去到英國薩塞克斯大學修讀媒體研究，高䠷身形（5呎8吋）令她早在中學時期已被星探睇中，但為怕阻礙學業，所以她只做part time模特兒，拍過7-11、麥當勞、銀行以及KFC等廣告，到前年畢業後，王詠珩隨即返港全身投入模特兒事業。
對於參選一事，王詠珩接受電話訪問時，就表示其實是一場意外。「本身係一個model朋友去咗參加呢個比賽，有日做嘢時佢問我有無興趣去玩，話之前俾咗我張相給選美主席睇，佢哋想同我見面，家人嗰陣仲笑我點會贏。」王詠珩指選美過程只需進行面試，泳衣環節欠奉，但由於面試是分開進行，所以對手有幾多人，她亦不太清楚，為了備戰11月的賽事，王詠珩每日都要上堂惡補catwalk、化妝、談吐等技巧，她笑言之前試穿過一對6吋高跟鞋，踏出第一步就差點仆倒。問到可曾想過參加香港小姐？王詠珩就話暫時未打算，「參加選美比賽係因為可以代表香港走向國際，認識多啲外面嘅世界，呢個係好好嘅機會，同係一件值得驕傲嘅事情，所以會比較希望參與國際性嘅比賽多啲。」另外，王詠珩亦表示有留意今屆港姐，但由於節目時間只係兩個多小時，好難判斷有無質素下降。其實單係睇王詠珩嘅談吐，相對雷莊𠒇，已是稍勝一籌。