【港姐2017】冠軍唔夠「香港」？　雷莊𠒇：細個會同爸爸去大牌檔

2017年香港小姐競選剛於9月3日順利完結，最後經由鄭裕玲Do姐「神聖」一票選出今屆港姐冠軍雷莊𠒇（Juliette）。話就話係選舉，但係認受性就好似唔多高。雖然賽果已經「塵埃落定」，眾多網民的評論反而有增無減。日前港姐冠軍雷莊𠒇的一段影片出現後，更有火上加油嘅感覺，大批網民更由討論區移師到Juliette的Instagram內直接追擊。網民批評不外乎是外表樣貌似賓賓，不懂中文廣東話，回流香港代表性不足，「不如唔好叫Miss Hong Kong，叫Miss TVB好過」云云。

面對大批網民haters，雷莊𠒇一於好少理，實行你有鬧，我有我出活動。呢幾日仲瞓得好好，唔受影響添。雷莊𠒇接受《香港01》訪問時表示：「我覺得個地球咁大，咁多意見，唔可以please到100%啲人。（你覺得自己please到幾多%嘅人？）哈哈，咁就好難講，因為我嗰邊加拿大有好多人支持我，依度都好多人支援我，我都知有好多人唔開心因為我攞咗冠軍。都係嗰句，人人都會有自己意見，係啱嘅。（即係幾多%？）I realy don't know，答唔到你。」

網民言論其實都是說這位應屆香港小姐雷莊𠒇不夠「香港」。在《香港01》訪問中，Juliette就有自己見解：「我覺得香港係一個好international的城市，每個人都有唔同background，都係唔同地方返嚟，所以我可以代表到唔同culture嘅香港人。其實我喺香港住咗10年。細個都會同爸爸去好多大牌檔食嘢，我好鍾意食椒鹽蝦同埋通菜。Daddy成日都會嗌蒜蓉蝦，食好多seafood。」

不過香港人有時候睇人都幾表面，第一眼通常都係睇個樣先，所以網上負評都是集中在樣貌身材上。但雷莊𠒇似乎又很看的開，她解釋道：「我明白香港人係有好多expectation，我的臉同身材係鬼妹啲，不過我係100%中國人。Daddy係澳門返嚟，Ｍami係香港人，所以我始終係一個中國人。（你perfer自己係中國人定華裔？）梗係中國人啦，我好proud of 自己culture，只不過我細個去咗國際學校，所以冇咗個感覺囉。」