【完美奸人】突發主持變御用奸人 　鄭子誠：我唔會話自己係好人

要數最入屋的無綫藝人，不是小生花旦，亦不是一眾水著女神，而是有「完美奸人」稱號的鄭子誠，由《真情》子浩、《烈火雄心》Marco、《封神榜》紂王⋯⋯以至最近的一《同盟》柳議員，及明天大結局的《超時空男臣》張誠，鄭子誠演繹的奸人，永遠最吸引，每一個眼神、表情、笑容都奸到出汁，令人回味，96年入行，鄭子誠奸足21年，不過最想不到，鄭子誠初入行時是做忠的，他接受《香港01》訪問，解說他的「成魔之路」，一切由《真情》開始⋯⋯

他說：「廿幾年前嘅事喇，當時我本身做緊《城市追擊》突發主持，採訪鄧家爭產案，但我永遠唔夠娛記跑得快，永遠都問唔到獨家嘢，咁啱我做緊城追嗰陣，佢哋cast緊一個《真情》新角色，一個來自大陸嘅戇直青年，自問當年真係相當戇居，或者當時監製（徐遇安），編審（陳寶華）定珍姐見到啩，角色原本係一個力爭上游嘅大陸戇直青年，但有日監製同我講，你做呢個角色永遠唔夠搶，因為劇中有阿海（黃智賢飾），佢係一個好人到唔存在喺呢個世界嘅人，你同佢鬥好人唔得㗎，不如咁啦，將個性格扭一扭，結果我個角色，由力爭上游變咗不擇手段，我好記得監製講個一句說話，佢話我眉宇間帶點奸意，佢未講之前，我覺得呢樣嘢唔會發生我身上，因為我身邊嘅人個個都話我好正直⋯⋯」

鄭子誠演的奸角，不單止完美，更是御用奸人，每套劇都需要這角色，但套套都演奸角，他亦試過感到氣餒，亦經歷過低潮，他說：「我諗2000年左右啦，當你不斷做奸角，一來覺得套套都係咁啦，當你要再續約嘅時候，公司話要減我騷，嗰下覺得好氣餒，因為減得，即係演出機會減少，咁我仲有冇得做呢？係咪都仲係做奸角呢？有一排真係唔知點演？我試過做到滑啞，我試過講笑咁話，不如你攞返我上套劇啲大頭奸人表情算喇⋯⋯」

而幫他渡過低潮的，除了太太外，就是他的黑膠碟、他的電台音樂節目，而鄭子誠未入行前，已移民加拿大，在當地做了廚窗設計師幾年，他說：「做緊設計師嗰陣，望到成屋黑膠碟，真係覺得好嘥，我喺度諗有咩辧法，先可以令啲黑膠唱片唔會慢慢流失呢？唯一就係做電台節目主持，亦係咁我返咗嚟香港，而喺我低潮時期，我好彩有電台，我用聲做嘢，得心應手過用樣做嘢，自信心未致於被打破。」 在電視台他是十惡不赦的奸人，但在電台他是聽眾的音樂情人，兩個極端，連鄭子誠都覺得精神分裂，他說：「當你喺電視拍緊殺人放火，半個鐘後返到電台開咪，然後要轉晒成個tone嗰陣，真係幾辛苦㗎，我覺得自己有少少變態，簡直係精神分裂。」

鄭子誠演的奸角深入民心，現實中的他當然不是奸人，但他亦覺得人天生是帶點奸的，他說：「我覺得自己唔係奸㗎，其實每個人都是性本善之餘，亦有性本奸，有時因為自我保護，或者家人，你會做出一啲別人眼中應為好奸嘅事，我唔會話自己係好人，我亦唔係大奸大惡，但我識保護自己，太太當然知我唔係奸人啦，不過佢見過又做奸，又會話：「吓？又係咁呀？」

由子浩這個奸人角色開始，鄭子誠演的奸角，亦一個接一個，而在他心目中《烈火雄心》的Marco，是他最深刻的，他說：「早期啲角色比較難忘，《烈火雄心》啦，嗰個角色真係衰到仆街㗎喇，你諗下連個細佬女朋友都迷姦埋，劇入面又要同古仔喺火場打啦，仲要係真火嚟㗎，所以印象好深刻，（網友叫你完美奸人？）太過獎喇，其實咩叫完美？點為之完美呢？我只能夠多謝大家支持。」