龍哥荒校驅鬼　二郎神托塔天王幫拖

龍哥又嚟喇！早前龍哥喺《Big Boys歷險記》被刪剪片段再被放上「Big Big Channel」，今次一大班藝員張惠雅、朱智賢、謝東閔等去到一間荒廢咗嘅學校探險，龍哥（杜慶龍）上演一場人魔大戰，仲請埋二郎神、托塔天王嚟幫手，我差啲以為睇緊《封神榜》呀！

呢集一大班藝人同工作人員一去到間村校，龍哥就喝住大家唔好入學校，因為佢發現附近好多妖魔鬼怪喎！而且鬼怪唔肯讓步好似要害佢哋咁，偏偏龍哥又有好多時間慢慢解釋喎：「佢哋唔妥協嘅！如果講唔掂數，就要打啦，因為佢哋本身修行咗一段日子，去到妖魔階級，同埋佢哋做咗好多傷天害理嘅事情，所以如果唔破佢哋，會出動再去害人。」

講講下龍哥耳仔紅晒：「我耳仔已經有火喺度燒喇自己感覺到。」為咗證明得佢感覺到，譚永浩就攞出探熱器放喺龍哥耳邊量體溫，量出３２度呀！好犀利，夏天流流有成３２度，室外冇冷氣真係好熱㗎！龍哥唔解釋點解有鬼會咁熱，明明啲鬼片話有鬼會寒喎！龍哥反而咁講：「我個頭已經開始發㷫嘞！即係佢哋已經準備就緒嘞！所以大戰一場在所難免。」嘩啲鬼已經辣㷫咗龍哥，咁快啲打啦！

未打得住，龍哥未講完：「我會落個天羅地網罩住你哋，唔係驚咩問題，而係佢哋分咗啲𡃁搞你哋嗰時，咁我同佢哋打緊點救你哋呢！」食花生是很危險的！鏡頭一轉，乾坤又一轉，龍哥紮行咗馬，雙手劃來劃去，口中唸唸有詞，依然係「一開一轉」嗰幾句之後，竟然請出二郎神、吼天犬，右手再劃兩下，又請出托塔天王李靖，睇得出戰況好激烈！龍哥一個喺空地踏前踏後、指來指去，一班藝員好緊張咁企埋一邊。

呢刻最怪異嘅事情發生喇！唔知點解企喺草邊嘅龍嫂突然彈起，攞起類似爛遮嘅物體不停揮舞，功架十足，但係睇唔到佢打緊乜。

鏡頭又去番龍哥度，不出所料，龍哥乜事都冇企番喺度，好堅定咁講：「妖氣清晒冇問題，剛才嘅情況你哋都睇到啦！」睇到睇到，成集最精彩嘅嘢播晒喇！啲鬼走晒至嚟探靈肯定冇嘢睇喇！