【乾坤一收……】黃建東睇中龍哥爆紅 二次創作上山打邊爐
要數本年度娛圈紅人，「乾坤一開一收，三七氣流一轉」freestyle式念咒龍哥絕對穩佔三甲位置﹗龍哥充滿娛樂性嘅作法加上揮灑自如話喊就喊，成為新一代驅鬼icon。憑二次創作而備受關注的黃建東(Derek)，亦趁機拍新片，實行龍哥上身扮作法，半夜三更着住羽絨去荒山野嶺度打邊爐。
黃建東接受《香港01》訪問時表示：「最近發現龍哥的作法 rap真的好 hit，一直在構思怎樣可以二次創作。後來發現用在打邊爐上應該幾搞笑，但如果只是在火鍋店內拍又覺得很普通，適逢是農曆七月，所以決定半夜三更走到飛鵝山來個戶外打邊爐。」片段中見到Derek摸黑上山，講到打邊爐要跟既定法則「爐頭一開，Gas氣流一轉」，將各款火鍋配料代入龍哥freestyle式念咒，加上誇張式手勢，人地作法佢就教人落配料打邊爐，片尾仲好似龍哥咁話喊就喊，令人捧腹大笑。
農曆七月喺荒山野嶺拍攝，Derek表示拍嗰陣有D驚，山上真係影都無隻，好在拍攝總算順利。不過無咩事自己都唔會喺呢Ｄ時份夜嘛嘛上山啦：「其實我最想搵龍哥crossover因為佢真係好搞笑，想佢親身教我兩招，作法手勢應該點做，經文內容點解！」
沉寂幾個月無拍片，大家都好奇Derek是否遇上瓶頸？「對上一條好似係扮朱主席，自己覺得風格好似差不多，唔想觀眾睇到悶。再拍片最大壓力，其實係個頭開得太好，PPAP個點擊率好高，同埋成為熱潮同icon，每次拍片好怕觀眾唔鍾意，覺得唔夠創意，呢方面係最大壓力。同埋搵題材其實好難，有點好適合但拍攝上有難度，又或者有D過氣過得太快，自己寧願再等等，終於等到龍哥幾好，同埋而家佢喺bigbig channel播應該仲會hit一排，同埋我要搵到D point可以惡搞，因為我唔係只係摹倣而係二次創作，要加入自己元素。」Derek話之前都會驚定型，「但而家諗通咗起碼會諗起係喜劇路線，藝人都需要一個鮮明image，大家諗起我會開心都係好事。」