袁偉豪張寶兒認拍拖就叫「好男人」　隔幾耐戀愛先算「尊重」EX？

男女之間的分手，永遠是最複雜最難解決的事。甚至乎分手之後再重新戀愛，也會有一個準則。袁偉豪離上一段戀情大約是9個月，而張寶兒的就大約是2年。究竟他們各自與上一段戀愛相隔多少時間，才叫做「尊重」前度?

近呢2日最多人講嘅，就梗係袁偉豪(Benjamin)同埋張寶兒(Bowie)呢一對「金童玉女」走埋咗一齊嘅新聞啦。正所謂男嘅型英帥又孝順，女嘅樣靚身材正又好心地，佢2位實在係繼陳豪，陳茵媺之後另一對廣受全港市民祝福嘅一對。而男方袁偉豪昨日亦都在公開活動中親口承認同Bowie拍拖中：「算係（拍拖）喇，不過而家要工作。(Bowie未認戀情喎？)都啱嘅，未過probation（試用期），大家磨合緊，要俾大家多啲時間。」今日呢，女方張寶兒回覆《香港01》提問時，又係講返差唔多嘅說話。張寶兒：「其實佢都已經講得好清楚，我哋大家係磨合階段。呢個就係最確切形容我哋宜家嘅狀況。」(會唔會太忙?)「大家都忙，咁咪有時間先慢慢了解囉。」係囉，任何演藝圈中情侶開始嘅時候都係咁答(我相信過多1年半載再問佢哋，都係會有呢個答案)。

睇返2個人嘅戀愛歷史，袁偉豪對上一個對象係拍咗拖3年嘅岑杏賢，而張寶兒一個對象就係一個拍拖8年「Long D」嘅圈外人。根據之前《香港01》介紹張寶兒嘅報導，其實佢嗰位拍咗拖8年嘅初戀男朋友由16年(2年時間)加入TVB之後就已經無疾而終，袁偉豪前女友與岑杏賢戀情就係去年8月(5月與張寶兒開始，即是距離上一段戀愛9個月時間)。

9個月和2年時間，真的是說長不長，說短也不短。究竟分手之後，相隔多久再拍拖才叫做合理和正確呢？不同年齡層可能會有不同的看法，而男與女生之間又有不一樣的看法。觀乎網上討論區的戀愛版，其實也有非常多這一類的文章。而剛好昨晚筆者與相識多年的好友)出外飲酒聊天(冇錯，男人失戀例必飲2杯)(先稱呼這位朋友為A君)。而他最近又與拍拖2年的女朋友分手了。經過了當晚4小時無間的吐苦水...

提出分手的是他女朋友，而這位女生實質是一位「大花筒」。試過4日3夜遊台北的旅行花了A緊總共3萬港幣，而女生自己卻從未掏過一分錢。而在A君眼中，她是一個「好吃懶做」又「不思進取」的人。每個月A君的所有花費都幾乎花在「供養」他的女朋友之上。昨晚在尖沙咀海旁飲酒聊天時，他的前女友仍然一直傳訊息給A君，實在奇怪。

不過問題來了，他喝了2口啤酒之後，問我：「喂，如果我話我鍾意咗第2個女仔嘅話，會唔會好過分？」（你唔係前幾日先散咩？咁快？）然後A君突然高8度的說：「唔係吖～有人規定過要隔幾耐先可以再溝女咩？」身為朋友的我就附和著說：「你啱，唔通要隔成年先可以搵下個咩？有女人話拍拖2年分咗手要起碼隔1年先可以再拍拖，咁先叫尊重個前度女友。」A君問道：「咁拍拖3個月呢？」我回答說：「3個月咪要隔個半月囉，跟住個邏輯的話。即係打個比喻，袁偉豪同岑杏賢拍拖3年，就起碼要1年零6個月，(我拿出電話算了一算)即係547日。而張寶兒呢，拍拖8年，即係4年...1460日。」

當然，以上這些都只是酒後亂語，更不能「一竹篙打一船人」。而將這個所謂的「理論」套在袁偉豪和張寶兒這一對身上，更顯得不合理。究竟分手之後相隔多久才算合理正常？而這個「相隔多久」的時間是如何界定？
在於男人角度，感覺來了或越到適合的對象就會出擊，治療情傷的速度肯定遠超各位女性的想像(或者根本唔需要)。而另一個問題，分手之後男人會不會因為顧及女方的感受？答案的話，各位可以問問自己，又或者問一問身邊的男性朋友...