《學是學非》張寶兒家擁禮頓山7物業 唔怕男友窮：將佢筆錢滾大
TVB節目《學是學非》今輯加盟了三個新是非精，除了應屆港姐冠亞軍馮盈盈同劉穎鏇之外，獲得「友誼小姐」美名的張寶兒（Bowie）也加入是非精行列。如果男人圍繞的話題是錢和女人，那麼女人最為人關心的問題一定是身材和感情，繼早前劉穎鏇自認跟在美國的男朋友感情轉淡之後，原來Bowie在加入娛樂圈之後，也跟拍了八年拖的男朋友分手，認真唏噓！
Bowie在英國倫敦大學畢業，回港後曾經做過廣告，自少對好玩嘅嘢特別有興趣，入娛樂圈都係機緣巧合報選港姐而入行。而她的前男友跟她在高中時期已經認識，是初戀而且拍了八年拖！當年參選時更被拿來跟Bowie好友，同埋高學歷又郎才女貌的麥明詩和林作做比較。
八年的感情其實應該好深厚，究竟點解會搞到分手呢？Bowie在接受《香港01》訪問時說：「我同我ex喺高中時候識，雖然唔同校，不過佢學校就喺我對面。佢係我初戀，其實生活上嘅點點滴滴都好浪漫，但係我同佢long d咗幾年，佢喺美國我喺英國，大家畢業後先決定一齊返香港做嘢。入嚟娛樂圈之後，大家睇嘅嘢唔同咗，我覺得大家都需要啲空間成長。暫時都唔會諗愛情住喇，專注事業先。不過可能之後都會搵啲年紀大啲，諗嘢成熟啲。我同佢係和平分手，因為佢係圈外人喇，都唔想太影響佢，所以都唔講咁多。但係都好感恩大家對呢段感情都好認真，同佢經歷咗咁多嘢令大家都成長咗好多，佢都對我非常非常好，關係都好好。」正所謂愛情話來就來，話走就走，可能連局中人都想像不到結局來得那麼快。
Bowie身在富裕家庭，家住禮頓山，有消息指其家人在禮頓山至少有七個單位，跟鄭少秋和陳茂波等名人住同一個屋苑，她表示間唔時都會同秋官碰巧一齊跑步。照返現時個放盤價，一個禮頓山最細嘅九百呎單位都要三千萬，如果傳聞屬實，實兒屋企已經係兩億家族，不過她就不清楚自己屋企有幾多個單位，還說：「我屋企唔算好有錢，但係屋企人都好錫我，會俾我做自己想做嘅工，所以我唔需要為咗屋企放棄自己想做嘅事。（揀男友要門當戶對？）至於擇偶嘅話，我覺得最緊要唔係睇佢工資，喺價值觀上可以溝通到係最重要，我個人係比較重視心靈人多過物質嘅。不過我都希望大家可以一齊進步，無論係自己修為同工作嘅熱誠等等各方面嘅嘢。其實要搵一個心靈上同你溝通到嘅人已經好難，呢個係先決條件，其他有就有，無就諗嚟都無用喇。」現今一個大學畢業生，隨時搵得萬幾蚊，咁如果真係心靈上溝通到喇，Bowie又會唔會接受呢？她說：「如果真係搵萬幾蚊，我希望我嘅投資技術更加強喇，可以將佢筆錢滾大喇，哈哈！」言下之意看來並不介意對方是低薪族，剩係呢個諗法已經可以加佢50分喇！