龍哥幫張惠雅驅纏身3鬼大迷信　事後Regen話：好似冇咁黑仔

Regen喺節目度同龍哥講成日見攰，龍哥就話Regen身上有3隻鬼，於是即場幫佢驅鬼。Regen全程只係企棟棟喺度，乜都唔使做；龍哥就喺佢身後指手劃腳、唸唸有詞耳熟能詳嗰幾句：「乾坤一開、天靈蓋開，天兵天將守，乾坤一開……鬼怪一個兩個三個，神氣就鎖到你一個，一個神氣、一個意志、一個狀態，三個唔好嘅靈體纏住你。」雙手不斷拍打Regen背脊同膊頭發出啪啪聲。

Regen縮一縮膊頭：「我左邊膊頭有啲痛呀師傅。」龍哥再諗咒，Regen就話：「我真係feel到有少少暖暖地隻右手。」唔知點解左邊膊頭痛同右手有關呢？

龍哥向Regen講解：「佢根本唔係你嘅債嚟嘅，不過走嚟搵着數，咁呢啲就簡單喇，因為佢唔啱吖嘛，所以趕走咗佢就ok，唔使理我嘅！」繼續拍拍拍。

跟住龍哥就好似同靈體談判：「走得嘅你就走，根本你哋就喺度博懵嘅啫！你哋見人運滯就走去夾人，你一廂情願咋喎……我唔係多管閒事，只不過我係受人所託……唔走你三個可以聯手對付我都得㗎！」但似乎冇人或者鬼想對付龍哥。「你走囉！但係走嗰陣攞番啲嘢走喎，放低咗喺人哋身體入面嘅你攞番走喎！走啦嘛！」然後再唸咒，又喺Regen背脊劃劃劃拍拍拍。

然後同Regen講鬼怪已經驅走晒，但要繼續做調節身體嘅儀式，呢part儀式好有趣，龍哥當Regen係一個藥煲咁，將啲藥倒晒落去：「靈神水三樽倒晒落去，天靈地靈人靈蓋一樽浸番鬆佢，之後長白星君丹爐藥開，氣管紫霞丹兩粒一落，清水兩樽倒晒落去，氣管鬆番晒；太上老君丹爐藥開，靈芝、甘草三錢，白樺葉兩片，片糖兩嚿，冰水兩樽倒晒落去，水管shr……」龍哥只係指手劃腳，冇真係倒嘢落Regen度，但唔知佢飽唔飽呢？

儀式完晒之後，Regen話龍哥細細聲同佢講咗佢：「你子宮有事。」Regen覺得好靈因為自己真係有婦女病咁話。

我哋就聯絡咗Regen，Regen稱上年開始覺得運滯：「上年月經唔舒服，成日病又攰又冇精神，都搵過其他師傅幫我，但可能未清晒，咁拍呢個節目前同龍哥傾過，工作人員話不如拍埋佢啦。」龍哥做完儀式後Regen就話：「月經都通埋，好似冇咁黑仔，個人開心咗！但其他冇乜大感覺，龍哥話需要啲時間至好番。」問佢覺唔覺得做法事係太迷信？Regen強調：「龍哥反而叫我唔好迷信，可能佢嘅方法比較新穎啫！」