囡囡急到瀨入殘廁被鬧 陸永撐老婆：都係在情在理啫！
撰文：何志衡
出版：更新：
做父母嘅都知道湊仔辛苦，小朋友有時係好難控制，陸永同太太Rainah閒時都會同兩個女Hannah同Simsim去街，不過日前Rainah同大女Hannah喺尖沙咀就發生咗唔愉快經歷。
話說兩母女喺買完雪糕同幫陸永攞完眼鏡之後，Hannah突然話要去廁所，媽媽Rainah即刻拖住佢衝上K11搵廁所啦，上到1樓見到殘廁就二話不說衝咗入去，Rainah表示當時囡囡已屙濕咗條褲，情況真係好危急；點知去完廁所一出門口就見到一個女人拖住個小妹妹俾說話佢聽：「咁大個都仲用呢個廁所！」Rainah就同佢講：「係呀！我個女頭先太急，唔好意思！」向對方道歉。
事後陸永老婆將呢件事寫咗喺ig，但亦忍唔住寫出心裡面嘅說話：「喂！我個女真係好急呀！有廁所係咪唔用呀？你個女都識行啦，咁仲叫唔叫嬰兒呀？大家都係父母，俾啲同理心得唔得呀？你個女著住尿片，我個女真係急到瀨㗎！」當然呢堆說話冇講到出口啦！
咁陸永又覺得老婆咁做啱唔啱呢？我哋致電畀陸永，佢就話自己都試過咁嘅情況：「我仲怪呀！我又唔入得女廁，大女而家咁大又唔可以帶佢入男廁，我極速訓練咗佢哋自己去廁所，得㗎喇！放心啦！好多熱心人士會幫手㗎！有啲Auntie仲會幫佢哋抹廁所板。」
咁會唔會帶囡囡入殘廁呢？「小朋友嘅嘢好隨機，小小急嗰陣會俾其他嘢分心，到最大急至出聲，咁趕的話咁我都會畀佢去殘廁，俾人鬧咪唯有講唔好意思囉，唔係點？尤其同小朋友一齊係唔應該同人鬧交。」陸永又話：「身教好重要，自己唔啱係唔應該話番人哋，就算冇影響佢都係自己唔啱，老婆處理得好好，道歉加評理係最好，都係在情在理啫！有時（對方）可以體諒下小朋友。」陸永又幾有道理喎！