【小企鵝大長征2】農夫點幫企鵝配音 原來係Freestyle:屈佢講嘢
因為《中國有嘻哈》,因為吳亦凡,大家都多句潮語用︰「你有Freestyle嗎?」
係咪身為Rapper就要有Freestyle呢?你大可以話冇,但對方又總會投以奇異眼光回望你一下,用眼神反問你一句︰「冇?!」
Freestyle不一定要配Hip Hop,更不一定在台上才可聽到,農夫今次為《小企鵝大長征2》配音,就趁企鵝把口只懂開和合,一於盡情以Freestyle配上不同內容,不過Free還Free,都有一定規限。C君︰「始終人家是好正經的紀錄片,而且好有教育意義,我們只是令內容有趣些。」
攝影︰歐嘉樂
有需要時要「收口」!
訪問前有機會先看套戲,未到一半,已覺得兩位配得非常出色過癮,問題係,會否太離題,人家法國原版是否這麼跳脫。陸永︰「法文版的取向是比較正經,溫情洋溢,其實我們都有有保留這方面情感,不是一味搞鬼的。」
需要正經時,農夫都一樣可以行正經,甚至覺得再講落去,會破壞電影畫面。「電影中有些親情畫面令人好感動,有些又好唯美好靚,我們都覺得不要再講太多,破壞這個美麗畫面,讓觀眾靜靜去欣賞好了!」陸永說。
今次是農夫第一次寫配音劇本,但嚴格來說是二次創作。C君︰「我們都會有個框,有同事將法國版的旁白和資料翻譯成中文後,我們再創作。資料上當然不可以改,我們能做的就是將這些資料如何變得有趣一點。」聽落幾守規矩,但去到本身冇旁白時,就是任意發揮的時候。C君︰「只有靚景的空鏡,我們便可以屈隻企鵝講嘢。」
不單止屈企鵝講嘢,甚至為牠們贈上一眾親朋好友。陸永︰「除了爸爸、仔仔,我們亦盡量一視同仁,身邊的三姑六婆都會講下嘢。」注意,到底牠們有沒有親屬關係呢,不得而知,但最緊要夠熱鬧。C君︰「這種配音幾好玩,因為夠隨意,不用夾口型,沒有之前配動畫那麼多限制和嚴格,更加不用跟足企鵝把口開合的次數去講,所以好好發揮,一開口講好多粒字都得,只要不要合埋口都仲講緊就可以。」說到底,都要多得整個團隊創作,對農夫的創作有最大包容。陸永︰「我已經講到企鵝好想買樓,咁樣都過到,證明大家都好有幽默感。」
「又唔見你問梁朝偉有冇Freestyle?」
吳亦凡喜歡問人有冇Freestyle,身為Rapper的農夫都應該被人私問過不少次,有冇覺得好煩呢?陸永︰「又唔會覺得好煩,等於問你有冇錢,有咪有,冇就冇。最煩係答完有,對方隨後會問多句︰『Rap兩句嚟聽下啦!』」C君亦承認這是做Rapper要承受的痛︰「好奇怪,你見到演員不會這樣問,正如你在街上撞到梁朝偉,你會唔會問佢最近有冇做戲呀?不如演一場嚟睇下,唔會嘛!唯獨Rapper就要俾人咁樣問。」
Yo!其實大家都係禮貌一場,問完你答冇都唔使怯場,創作呢家嘢唔使下下玩即場,要聽不如年底去紅館捧佢哋場!(雙押X2)