【港姐2017】17歲Mandy緊張失眠　唔怕狀態差輸蝕：對自己有信心

港姐外景來到第三日，除了海外佳麗Juliette贏了第一日的潮流穿搭比賽，可以同游生單獨拍攝，其餘佳麗今日就穿上夏日繽紛服裝到大安森林公園進行拍攝。最年輕港姐，17歲的邱晴（Mandy）好像還不太習慣，一時滔滔不絕，一時又回到靦腆mode，好似今日咁，影相時身旁的保姆都忍唔住出聲：「你盡情影喇！」Mandy才露出招牌怕羞表情，慢慢擺甫士，真係好難捉摸。

問到Mandy是否還未習慣，她說：「都唔係呀，只係呢幾日好夜瞓，又好早起身，所以望落精神唔係幾好囉。（幾點瞓幾點起身？）都成兩點幾瞓，今日又五點三起身？（因咩事咁遲瞓？）冇呀，可能因為我真係好緊張，夜晚唔係好瞓到，所以夜瞓。」問到現時好似被其他佳麗輸蝕，Mandy就話：「唔會呀，我對自己好有信心。」叫她示範甚麼是自信，她隨即以笑容說明。

至於一身阿拉丁茉莉公主look的張寶欣就話昨日終於有得瞓夠八個鐘：「噚晚11點瞓，之前有幾日都冇瞓夠八個鐘，加上之前準備行李又拍攝咁，所以望落去好攰，我都承認自己狀態唔係咁好。」她說港姐外景雖然冇得自己出去玩，但係同佳麗一齊食嘢好開心：「我都冇話想去邊。」聽落寶欣都好聽話，冇心郁想靜雞雞走出去。