【任噏亂評】聽陳奕迅唱歌要靠內地節目　香港樂壇俾電視台累死？

新一季《中國新歌聲》又嚟喇，今季仲有堪稱「史上最豪華導師團」的周杰倫（周董）、陳奕迅（Eason）、那英及劉歡坐陣，第一集節目組就晒冷派出周董和Eason合唱《謝謝儂》和《印第安老斑鳩》，Eason又和那英唱了《天地在我心》，一連唱了幾首歌，香港樂迷見到即刻高呼「好正呀」、「好聽呀」……但停一停、諗一諗，雖則個節目ViuTV同步播放啫，但點解香港人睇本土天王要係一個大陸節目到睇嘅呢？

計返對上一次喺電視見到Eason，原來已經係年頭ViuTV直播的《2016年度叱咤樂壇流行榜頒獎典禮》。香港嘅電視台本來就已經少，仲要無綫同環球唱片因為版權問題已經嘈咗好多年，Eason作為環球旗下的歌手，上無綫就緊係冇佢份啦，而版權風波除咗Eason受影響，好多環球歌手都遭殃，但損失都唔止係環球，要知道好多天王巨星，如許冠傑、張學友、陳慧琳等歌手的版權都屬於環球，兩大龍頭鬧交，傷的原來是香港觀眾。

老實講一個歌手嘅知名度同佢嘅曝光率真係好有關係，歌手唔多出現喺電視機真係好難入屋，依家電台又少咗人聽，想畀人知你識唱歌就更難。一個歌手要做好音樂都要擺錢去投資，派台之後要宣傳，提升到知名度先可以賺錢再投資下一首歌，缺乏宣傳平台應該係好多歌手面對嘅難題，眼見大台音樂節目出現的面孔總是重覆又重覆，不禁慨嘆有人老是常出現，有人卻宣傳無門。

幸好去年ViuTV的誕生，樂壇總算出現咗曙光，ViuTV好快就錄咗幾個音樂特輯，又搞咗個《林說金曲》，用嶄新嘅方式玩「民調金曲」，嚟緊仲打算開拍音樂劇《短暫的婚姻》，傳聞依套嘢仲會有Eason演出！其實ViuTV試好多新嘢去搞好樂壇，而奇妙電視都有個《同SING同戲》畀歌手做宣傳平台，不過暫時以資源同收視計，tvb似乎仍然未被挑戰。無綫近年開始搵返啲舊人回巢拍劇，成效顯注，搞返好個戲劇組之後，無綫會唔會都考慮下同唱片公司改善關係，等啲音樂節目可以更多元化，有更多面孔可以出現呢？