G.E.M.同JW十年姊妹情不再　為男友斷聯反目

歌都有得唱「戀愛大過天」，女仔通常都拍拖至上，愛情第一友誼第二，將男朋友放第一位，幾多年朋友都冇情講。就好似G.E.M.（鄧紫棋）同JW（王灝兒）咁，人生冇乜幾多個十年，而佢地先廿幾歲人就已經做咗十年朋友，都算係難得嘅友情，但上幾個月阿G.E.M.被人發現佢拖住個男仔喺日本旅行，嗰個竟然係JW個前度男友，唔係話「朋友『夫』不可窺」嘅咩？新聞出街之後阿G.E.M.都大方默認，仲話佢結婚先會話畀大家知，睇落都好似風平浪靜咁。

成件事咁尷尬，話晒都係自己個Ex.點會唔介意阿？「矛盾只因深愛著，你知嗎」，JW尋日做電台訪問時提起G.E.M.就面有難色，自爆已經同G.E.M.冇聯絡：「我哋近排冇乜聯絡，大家冇乜搵大家，佢開心咪得囉。」聽落都有啲酸啊！咁啱G.E.M.去TVB錄《流行經典50年》，講起男友Mark佢就笑到好鬼甜，雖然G.E.M.就話同JW冇芥蒂：「呢排少見咗朋友，超蓮都投訴，但太多呢類傳聞，唔尷尬都變尷尬。」十年姊妹情就因為咁而冇咗，都幾可惜，G.E.M.就堅持話要結婚先公布，唔知到時結婚嗰陣會唔會好似胡杏兒請李施嬅做姊妹呢。