年少獨白｜疫情迷失求學方向 網課支援少老師頻流轉 嘆獨自打仗
有調查指，學童快樂指數是近六年新低。三年疫情過去，復常成為目標，人人落力追趕，中途始發現，有人身心未能同行，特別是年輕學子，面對學業、家庭、朋輩關係等問題拉扯，困惑與憂愁無處安放多時，大人欲伸出援手，也未能捉緊每對手。《香港01》訪問四位年輕人，他們訴說各人之困，如何解開心結，願身邊人如何助己。
17歲的Jack（化名）是大學一年級生，高中生涯疫情中渡過，日復日在家網課，學習效能大不如前，成績一落千丈，抗疫生活漫無目的，令身心受到抑壓。他憂心學業的倒退，也不解求學求甚麼，有感無人能助，老師頻繁流轉，朋友未能相見，家人隱藏各自問題，心事無處傾訴，情緒徘徊於抑鬱與躁狂之間。他後來主動約見社工，透過傾談重新檢視壓力來源，也學懂調節與現實的距離，聚焦自己的能力，量力作出改變，寄語同路人毋須輕視自己的生命。
疫情時每一日都一模一樣，好無聊，唔知做緊咩。
疫下學習感迷失 最懷念校園打籃球 小息部買撈麵
「每日都過得好開心，我想打波，我就搵人落去操場打波。」回想未遇上疫情時的初中歲月，Jack最懷念是與三五知己打籃球，放學盡情打波數小時，透支精力與汗水。他又懷念到小息部，買最愛吃的撈麵。
簡單的校園生活，被突如其來的疫情打亂，他再也沒有打籃球。高中三年以來，他在疫情中渡過，經常留家上網課，日復日的抗疫生活，令他感到迷惘，「好似每日朝早起身，我就拿拿臨擦完個牙，就打開部電腦，對幾個鐘，食飯食完，再對住部電腦。每一日都一模一樣時，好無聊，唔知做緊咩。」
成個教育好似好兒戲，好似學生自己食自己，自己打自己仗。
老師頻繁流轉 師生無法建立關係
Jack長時間身心受到壓抑，處於抑鬱與躁狂之間，學業成績亦因此一落千丈，由原本全級考30至40位，跌至全級120至130位。他感到十分憂心，卻有感無人能助。本港正值移民潮，不少老師離港發展，學校之間出現「音樂椅」效應，其校老師亦頻繁流轉，師生無法建立關係。
「你感受到老師很大壓力，因為我哋走咗好多老師，一個老師要教好多好多班，數學老師換咗兩次，隔離班班主任，有一班換咗一次，另一班嘅班主任換咗兩次。」他感嘆道：「成個教育好似好兒戲，好似學生自己食自己，自己打自己仗。」
要提自己有啲嘢，真係有啲改變唔到，仲仍然有啲野你仲改變到，你淨係望個度，不斷提醒自己。
一家人不擅講心事 求助社工疏理思緒
心中的憂慮與愁緒，他未有想過與家人傾訴，因為一家也不擅長將心事宣之於口。最後他決定找香港小童群益會的駐校社工求助，「我聽講同學有搵社工去傾計，雖然嗰同學平時嬉皮笑臉但佢都去，我就覺得呢個都係選項。」
每次與社工的傾談，Jack說，是整理自己想法與感受的過程，情緒獲得釋放，內心感到舒暢。他留意到負面的情緒，源自於不自覺地與人比較，「其實我唔洗同今日嘅其他人去比較我同番自己以前嘅、昨日嘅自己去比較，咁樣一步步進步。」
香港咁樣嘅經濟結構，係一個叫人番工嘅城市，而唔係一個叫人發展嘅城市。
感嘆香港出路選擇少 提醒自己量力改變
求學求甚麼的疑問，一度纏繞其心，他後來也疏理出一個答案。「我無搵到想做咩，但我諗到點解，點解我要畀力，點解我要讀書，讀書係一個自我評價。除非你係畫畫天才、音樂天才除非你另一個領域搵到自己的價值，否則你作為一個學生，呢樣係衡量你自己係咩嘢，衡量自己有咩能力嘅一樣嘢。」
如果有機會再選擇一次，Jack說，會選擇讀心理學、哲學、文學，「自己揀自己想吸收嘅嘢讀，探索呢個世界有咩對我吸引，呢個世界有咩可以激發到我。」不過，他直言很早已放低這個想法，「實際上你真係無得揀……係香港咁樣嘅經濟結構，係一個叫人番工嘅城市，而唔係一個叫人發展嘅城市。你要改變成個好香港結構性嘅嘢，去到最後學生先揀到。」
他說，反而會提醒自己，量力而作出改變，「要提自己有啲嘢，真係有啲改變唔到，仲仍然有啲嘢你仲改變到，你淨係望個度。」
呢刻你覺得無意義嘅野，其實換一個time frame（時間軸） 去睇，就可以由無意義變有意義，唔一定覺得自己對世界無影響。
重視親民、連接感覺 寄語政府與年輕人建溝通渠道
近年學童精神健康再受社會關注，成年人可以如何幫助年輕人？於Jack的理想世界，他希望老師能有足夠時間傾聽和回應學生；政策制定者能夠與年輕人建立溝通的渠道，「要感受到真係一個人同一個人直接嘅關係，去畀青少年表達自己嘅意見。」
他想像政府可以製作一個廣告，附上二維碼，「scan（掃描）完可以直接send（發出）一個回覆畀一個政府嘅人，佢睇咗你係睇到，佢回應咗你係睇到。係一種咁親民、咁有connected（連接）嘅感覺。」
他寄語同路人，若果未能自救，倒不如找身邊人求助，「呢個世界嘅人唔係真係咁冷漠無情 」，同時毋須輕視自己的生命，「依家呢刻你覺得無意義嘅嘢，其實換一個timeframe 、時間框去睇，就可以由無意義變有意義。」
不一定覺得自己對世界無影響，自己做嘅野無意義，唔一定係，睇你點睇。