無綫連點擊都要食盡 睇坤哥自彈自唱焗裝新app
TVB明年4月將會推出應用程式「大台網（Big Big Channel）」，形式就好似早前香港hit過的直播app 17。TVB的藝人可以透過這個App去直播自己唱歌，又或者同Fans傾偈甚至自拍創意短片，諸如此類。據知都有額外收費部分，例如睇藝人要開演唱會，用戶睇show畀唔同價錢，就有唔同享受；而裝了App的用戶就可以睇直播時「送花」畀藝人，藝人因此都有著數，按like數當show錢，越多人like就越多錢收，可以當是第二個搵外快的工具，吸引不少藝人未來要積極吸like搵錢。
不過，好多TVB有藝人都是以Youtube拍片起家，例如黃建東、吳業坤及張彥博等。如果「大台網」推出之後，TVB又會否要求相關藝人日後都要拍片放上「大台網」，而要放棄Youtube？又或者限制藝人在Facebook、微博等社交平台的曝光率，藝人亦隨時要「將最好留給TVB」，即係觀眾想再睇坤哥自彈自唱，亦要焗住裝「大台網」個App，看來無綫係連網上Hit rate都食埋！
《HK01》記者就有關情況問過近期網紅兼即將參與「大台網」的黃建東，他說：「曾經我都有問過類似問題嘅，公司就話可以喺每個channel都有啲，不過我諗有啲特別嘅片就要擺返『大台網』，同額外收費item裡面，或者喺大台網嘅話，就會拍返同TVB多啲關聯嘅片，宣傳下劇集，我都想兩邊都可以Balance返。」不過，問到「大台網」與Youtube，哪一個多錢賺啲？黃建東坦言「大台網」應該多啲。
另一方面，先不講「多like有show錢」制度，有指TVB都會要求藝人在「大台網」保持活躍度，問到黃建東會否覺得大台網一出，有多樣嘢要諗，分身不暇？他反而不太擔心：「公司的確都有同我講要度多啲嘢，創意可以源源不絕嘅！我諗都主要行搞笑路線，除咗唱歌，都會諗下啲得意嘢。」至於分紅制度似唔似要跑like數？黃建東表示：「都唔似嘅，始終網絡世界有好多人，自己嘅人氣都係呢兩個月係網絡上面得到。」