拍得「深度旅遊」節目　豈能用「放牧式」拍法？

放牧，即係牧民帶住啲牛羊，去某個地方，由得佢自己食草飲水，可以話係最悠閒嘅畜牧方法。
放牧者嘅責任，就只需要搵到一個有草有水又無危險嘅地方，其餘嘅嘢，就交畀牛仔羊仔佢哋自己搞掂。
到時間差唔多，就趕返啲牛羊入欄，收工！
無錯，你睇緊嘅係方以文講電視；以上嘅放牧情況，可以喺電視度見到。
不過唔係動物頻道喎，而係旅遊節目。

深度旅遊主持分享　為節目增值

旅遊節目對依家嘅觀眾嚟講，唔係有靚景靚人就得，尤其喺呢個「旅行我都成日去啦」嘅時代，去大路景點的話，好多觀眾都唔會收貨。要介紹一啲少人去嘅景點，幕後人員同主持就要做足功課嘞。我就鍾意睇啲「深度旅遊主持」擔大旗嘅旅遊節目，除咗景點，仲可以聽吓佢哋嘅分享，呢啲就係佢哋為節目增值嘅地方。

講真，上網乜旅遊資料都有，如果無咗呢班主持，駛鬼坐喺電視前面睇你咩。

「深度旅遊主持」分為幾類：

 　第一類就真係對個地方好熟悉嘅人，好似杜如風去日本咁，去第二度都死（詳情可以睇返佢去首爾）；

 　第二類係做足功課嘅，好似係星期六 J2 播緊嘅《50日背遊中美》個主持梁彥宗咁（佢係當年澳洲絕世筍工比賽最後三強），用自己熟悉嘅 backpacker 套路去做節目。

以上兩類主持，都係自己做埋資料搜集、寫埋稿，呢啲節目通常都有返啲水準；

 　第三類就好似洪永城、黃翠如咁，識得將 writer 嘅資料消化，再將自己嘅經歷或者睇法，融為一體去講畀觀眾聽。呢個方法要靠個人修為，如果對世界無感覺嘅就做唔到。

空殼主持　無經歷無意見　無料無Feel

好喇，講咁耐，數嚟數去都係得 4 個人名。但自從余小姐入主大台綜藝科之後，就十個有九個旅遊節目都會用「深度旅遊主持帶你玩盡食盡當地」嘅包裝方法。啲主持行行吓、食食吓，都要 sharp cut 去佢哋企定或者坐定咁，望住個鏡頭講嘢。有料或者有feel 就話咋喎，如果係空殼主持，叫佢對住鏡頭講自己嘢，咪即係陷佢於不義？唔係每個人都有意見同經歷，而又願意同值得用珍貴嘅 airtime 同觀眾分享㗎嘛。尤其係啲無做開主持、年紀又細嘅藝人，真係唔好用呢個方法去玩佢哋喇。

ViuTV「放牧式」拍旅遊節目　無故事無景點

你睇吓ViuTV星期三、四晚播緊嘅旅遊節目《歐遊全細界》就領嘢喇。

條橋係好嘅，睇吓啲歐洲小國，大部分觀眾未去過、靚又景，普通咁拍其實都穩陣嘅。點知又係用「深度主持遊」嘅方法去拍，但係兩個主持咩都講唔出，又無火花，真係災難呀。個節目嘅情況，就好似放牧咁，揀咗個靚地方，由得主持自己嚟，大部分時間都無故事、無景點，齋行……喂，咁都夠膽死嘅？

其實新台嘅旅遊節目暫時都有呢個通病。重點嘅「半旅遊」節目《跟住矛盾去旅行》都係用「放牧式」方法去拍。啲人係充滿矛盾呀，但唔係放佢哋喺一個地方就會有事發生喎。何韻詩同高皓正就得，因為兩個都係口水佬。如果遇上啲「非自爆式」嘅主持，咁就死得啦。好似葉蘊儀同連詩雅嗰兩集，叫佢哋去佛羅倫斯做乜啫，完全唔關個地點事。去到聖母百花大教堂出面居然叫佢哋畫畫？我連百花大教堂都見唔到咁濟呀，直接放佢哋喺香港離島困獸鬥已經做到呢個效果啦，飛到歐洲咁遠做乜？

一句到尾，玩橋要玩得好。如果無信心嘅話，正正經經、四平八穩去拍返個純資料報告式嘅旅遊節目，揀個無乜人去過嘅地方，有靚人靚景，我估大部分觀眾都會收貨嘅。我？上網搵啲旅遊 blogger 睇吓可能無咁嬲。

（本文純屬作者意見，不代表香港01立場。）