【電視新朝代】毛記很危險

當呢班會上網嘅年輕族群唔再理無綫，毛記電視就算貼市到日日惡搞無綫嘅節目都無用…無論係風頭一時無兩嘅《矛盾》，定係其他好似《煮吧！換咗我阿媽》、《慳D啦Honey》咁，ViuTV都將社會議題、政治人物娛樂綜藝化。對於以極貼市嬉笑怒罵分析時局做主打嘅毛記電視嚟講，可以話係正面抽擊… ViuTV會殺死嘅，點會係無綫呀？毛記再轉唔到身，創唔到新猷嘅話，就應該係咁先。

踏入4月電視新紀元，再加上無綫業績繼續跌，好多人都話大台今次會受重創。不過如果我上一篇文嘅推斷無錯，忠實粉絲再加上吸納咗部分亞視遺留落嚟嘅觀眾，大台邊有咁易死，最多咪跌嗰5點，反而最大危機嘅係毛記電視。

毛記電視食住大家對大台嘅不滿而面世，極速惡搞加上夾到正個時勢，吸納咗一班想睇電視又只係得無綫而夾硬睇嘅人轉去佢哋嘅懷抱（無電視睇真係會世界末日㗎），將無綫同毛記串連，將呢班觀眾成功過咗戶。鍾意睇毛記嘅人，大部份都有睇開無綫，所以毛記惡搞無綫嘅節目先至咁有共鳴咁有迴響。由毛記藝員一開始扮無綫新聞主播，到節目《六點半左右新聞》、《勁曲金曲》、《星期三港案》、《歡樂滿Share》，再到大型現場節目《勁曲金曲分獎典禮》，同埋就嚟嚟料嘅《萬千呃like賀台慶》，樣樣都係由無綫嘅經典節目發展出嚟。

你諗下，四月電視界若然真係如大家所願，大台仆低新台起，邊個最快摺？係喇，應該係毛記。

其實近幾個月都開始有啲蛛絲馬跡㗎喇。無綫嘅節目，大家已經提唔起興趣去鬧，漸漸退出大家嘅關注範圍。焦點就轉咗去ViuTV嘅《跟住矛盾去旅行》等等嘅「實況娛樂綜藝」節目。有一班等咗好耐新電視節目嘅人，終於都得償所願，就算係只係得嗰條短短嘅預告，都足以令到呢班人走咗去，唔再討論無綫。當呢班會上網嘅年輕族群唔再理無綫，毛記電視就算貼市到日日惡搞無綫嘅節目都無用。你見近期毛記就算力谷台慶，氣勢、like數同埋討論度都不升反跌。再加上ViuTV所主打嘅「實況綜藝」，正正回應咗後生仔對於無綫節目離地嘅不滿，填補返個電視缺口。無論係風頭一時無兩嘅《矛盾》，定係其他好似《煮吧！換咗我阿媽》、《慳D啦Honey》咁，ViuTV都將社會議題、政治人物娛樂綜藝化。對於以極貼市嬉笑怒罵分析時局做主打嘅毛記電視嚟講，可以話係正面抽擊。

依家毛記電視絕大部份節目，都只係惡搞同二次創作，要佢哋搞一個恆常自創節目，現時所見嘅就只有《星期三港案》。但係呢一類實牙實齒嘅節目，又係咪嗰一班想嘻嘻哈哈嘅網上觀眾睇嘅題材呢？又或者問毛毛可唔可以handle到呢？

再者，ViuTV擺明車馬搶網上市場，未開台先開app，就算係紅到爆炸嘅《太陽的後裔》，都決定喺app播完，再喺電視播，完全明白網上觀眾同電視觀眾係兩個族群（無綫推myTV SUPER就好明顯望唔透呢個point）。ViuTV如果成功搶佔咗某一部分網上用戶嘅時間，對單靠網上平台嘅毛記嚟講打擊就更加大。

所以話，ViuTV會殺死嘅，點會係無綫呀？毛記再轉唔到身，創唔到新猷嘅話，就應該係咁先。（雖然林日曦好似話過執咪執囉，無咩特別。但請照顧一下每個星期都會追住《勁曲金曲》嘅毛粉呀老細﹗）

（本文純屬作者意見，不代表香港01立場。）