【亞視熄機．博評】節目預告：翡翠老人台

翡翠驟變老人台

我估睇開亞視嗰班老年觀眾，應該會畀翡翠台接收咗。當亞視喺大氣電波消失（但係佢應該會喺世界存在多幾年，有機會再講），老品牌嘅廣東話頻道就只係剩低無綫翡翠台。老人家見到認識嘅台，轉過去睇嘅機會係好大嘅。而無綫都一直做好部署，開咗啲啱老人家口味嘅節目。例如係阿姐同秋官主持嘅《靚聲王》，仲有旦哥嘅《活得健康嗎？》系列，擺明目標觀眾唔係年輕人。其實近年愈來愈多年輕人唔理無綫，加上忠實觀眾嘅年齡層隨住年月向上移動，一直以穩守見稱嘅無綫，極有可能會順勢變佢做老人台，話晒又吸唔到年輕人，銀髮市場呢個電視market食得唔好嘥。

ViuTV專攻後生仔　有線活力不再

你又唔好以為銀髮市場無人爭喎，你睇吓想當年好young嘅有線依家播緊啲乜？係汪曼玲嘅《星級會客室》呀，仲有司棋姐石修哥主持嘅飲食節目《食得有法「補」》。自己友唔捧（我覺得《為食情報局》兩位女主持係幾好），反而積極回收離巢嘅無綫人，先後有張可頤、吳綺莉、楊思琦等等，就算只係貪方便就手，希望食盡呢班人嘅名氣，都會唔覺意吸引咗一班當年鍾意佢哋嘅觀眾。觀眾層老化，有線唔會睇唔到，如果唔係《星級會客室》點會來來去去都係訪問以前嘅明星？分分鐘仲係專登嘅。當ViuTV主攻後生，加上有線喺無乜錢嘅情況下，其實唯有繼續食無綫離巢明星嘅老本，想有線變返以前咁有活力、返老還童都幾難。佢旗下嘅奇妙電視到依家都唔知去咗邊，唔好話佢哋嘅方向見唔到，根本連個影都見唔到。

仲有隻黑馬係港台電視。本來都可以唔理佢嘅，但係唔知好彩定唔好彩，亞視嘅模擬廣播將會由港台電視接手，有幾多年長觀眾會唔轉台無啦啦流去四平八穩嘅港台電視就要望實啦。

當然以上一切都係我斷估，四月仲有一日就嚟到，到時睇吓開大定開細﹗我份人就最想大家都有電視睇，所以你哋唔好再話翡翠台不思進取喇，佢哋都係照顧老人家咋（好似係）。後生仔，你想睇啱你嘅嘢，睇其他台囉。