【河國榮被代言】呃鬼佬食曲奇？

呃鬼食豆腐就聽得多，呃鬼食曲奇就真係第一次見。

話說「真．香港人」河國榮噚晚出Post，講述自己疑似快閃「被代言」經過：收到通知話《蘋果日報》想同佢做曲奇訪問，去到舖頭，畀人安排影完幾幅相就完場。結果幾日之後「假訪問」變咗「真廣告」，大讚曲奇有幾好，搞到河生要澄清，自己從來無做過呢間被網友懷疑抄襲別人品牌嘅曲奇店代言人。

客觀講，件事其實得三個可能性：

一、河國榮吹水，其實佢真係代言人，不過各種原因反轉豬肚。

二、《蘋果日報》廣告部正＿ ＿，度埋啲咁嘅橋幫客搵星做宣傳。

三、個客本身出古惑，呃完鬼之後落廣告，陷各人於不義。

關於一，機會趨於零。先唔講大家幾鍾意河國榮，幾認同佢呢啲「人格信心」，純以品牌價值講，明星本身就係個人品牌，無必要冒風險講大話去抹黑另一間公司，影響自己的品牌效應，除非本身真係牽涉重大問題，例如走代言費，或者好似今次咁，無端端免費代言品牌，咁要爆響口討公道實在相當合理。

至於人格信心部分，唔使講，好似法庭判案，都會考慮個證人係咪誠實證人先。河國榮一整段娛樂圈血淚史，好多人都耳熟能詳，「默默耕耘」四隻字已經係金漆招牌。至於間曲奇舖呢？本身已經畀人話向另一間香港著名曲奇餅「致敬」，後來又反過來出聲明話自己畀人偽冒，搬龍門出神入化，有得揀，你揀信邊個？

至於二，係假設呢篇係出自《蘋果》廣告部嘅「軟文」（Advertorial），咁照計廣告部幫人度呢類膳稿，唔會咁樣衰叫個星「快閃」，因為個星本身可以問返客戶找數，廣告部唔使咁樣度橋去呃星兼慳錢，只需諗點同雙方取得聯繫，等個客同個星雙方都知對方咩來路，例如係咪用訪問形式出，價錢收幾多等等。作為中間人，協調歸協調度橋還度橋，做唔嚟都無得夾硬嚟，即係畀三千蚊車馬費請李安納度代言得唔得？發夢無咁早啦大哥。

仔細啲睇，篇稿角落頭落嘅係「廣告」，唔係《蘋果》軟文常見嘅「客戶資訊」，咁個客自己砌成稿畀錢落廣告嘅可能性就增加。如果係落廣告嘅話，廣告部雖然有人幫手砌稿扮內文，但係唔會特登走去問個客「你點搵到個星？」，要審嘅都係美術同法律問題，而唔會過問製作細節。

1.　佢FB曾經出post多謝河國榮

2.　個post畀人係咁留言質問佢係咪呃鬼

3.　admin係咁del相關留言，有殺無賠

4.　累計太多嬲嬲，引刀刪post

5.　河生後來回應，係有人冒認《蘋果》記者再攞去登報

好啦，咁而家梗係等睇曲奇店聲明啦，可能犯法喎。話說香港稍為出名嘅曲奇餅都好似成日出災難，一係就難食衰抄襲，一係就唔做香港人生意，其實想關公抖抖，與其攞啲曲奇去拜佢，不如老土啲，諗下點做番間良心企業仲好過。

（更新：災難嘅野，真係一秒都嫌長。做職安真漢子真係好重要。 曲奇舖未出聲明，蘋果就先行一步，總編話《蘋果》並無「任何編採人員」參與有關廣告內容製作。歸功於對咗689幾年，語言偽術嘅嘢真係要望真，無任何編採人員係真，咁廣告人員呢？絕不會混淆新聞採訪和廣告製作，咁廣告製作本身嘅專業操守呢？可能性二而家又死灰復燃啦，蘋果廣告部會唔會有啲唔係編採人員嘅人員，用自己嘅方式去約河國榮呢？係咪好似李波咁以為自拍比傳媒就得呢？曲奇舖快啲出聲明啦。）

（本文純屬作者意見，不代表香港01立場。）