【90後創業】情侶檔年賺700萬？ 「因為冇大學證書，我要搵錢」
由細到大，學校教曉你的是「讀好啲書，考好啲試，搵份好工」。所以，創業一直都是不一樣的路。
「冇錢仲講咩夢想，純粹是我冇大學證書，我要搵錢」，年僅26及27歲的90後情侶，已是8間公司的老闆，生意遍及中港兩地，卻被網民挪揄「有父幹」，但兩人均否認「有父幹我就唔洗同人合資，咁我真係賺到嘔血」。
Alan：「如果要繼續讀大學，我屋企人就要賣樓，我唔想咁」
現年26歲的伍卓倫（Alan），7年前與女朋友Zoe創辦設計公司起家，現時生意遍及雷射槍、綜合遊戲場，以及明記甜品，「百足咁多爪」收入亦比同齡的人都要可觀，早前接受傳媒訪問時提到「情侶年賺七百萬」，Alan坦言，「我當時睇到都打咗個突，我哋有10幾個拍檔，分都唔會分到太多」。
輿論一發不可收拾，網民群起挪揄「最緊要有個乜乜老竇」、「成功需父幹」等等字眼攻擊，Alan就指並非如此，「我真係需要靠父幹嘅話，我不如自己開晒佢，咁我真係爽YY，真係賺到嘔血」。現時父母已經退休，Alan已經成為一家之柱。
【點擊觀看】
相愛7年，既是情侶，又是合作伙伴，兩人究竟如何維繫？
14歲就被家人送到新西蘭讀書的Alan，讀了三年多直至高中畢業，卻遇到人生的轉捩點。「當時屋企人住杏花邨，當時我知道家人嘅環境，若然要在新西蘭讀埋大學，我家人就需要賣樓」。Alan沒有接受家人賣樓求榮，因此18歲左右便回流香港。
「因為成績唔太好，返到嚟Jupas（大學聯招）冇大學收我」，於是Alan選舉讀市場營銷的Top-up（銜接學士），差不多同樣時間，認識了現時女友Zoe，「都好彩遇到佢，帶我走一條創業嘅路」，兩人還未畢業，便創辦了第一間設計公司，不需要任何父幹，「唯一的支出就是$6000開間公司，加上每個月$200的虛擬辦公室地址」。
Zoe：「每日朝9晚5，其實我諗唔到任何有趣嘅嘢」
在香港理工大學設計畢業的女友黃俊然（Zoe）坦言，「讀緊書嗰時，已經好知道自己做緊乜，year 2做實習時見到，每日朝9晚5，其實我諗唔到任何有趣嘅嘢」。
Zoe自己主力設計，Alan則負責市場營銷，兩人「拍住上」於2015年引入在外國流行的鐳射槍War Game，在銅鑼灣開設「Laisermads」，找來13個股東，合資158萬，大受歡迎，4個月便已回本。Alan坦言去年單是鐳射槍的純利便有250萬。「見到好好生意，當時就決定在內地再開，始終租金無得比，加上有朋友經常往返內地，可以放心睇住」。
去年他們更於同一幢大廈添食，與10多個朋友投資150萬再開設另一綜合遊戲中心「Combo」，有得玩PS4、VR、乒乓波、飛鏢、桌上足球等，深受年輕人歡迎，於放學時段，學生更是蜂擁而至。同樣地，將生意複製到內地市場。
兩人又意識到，以上生意屬潮流玩意，熱潮可能有冷卻的一日，所以找來西灣河著名的明記甜品合作，在銅鑼灣開設分店，以全新的面貌示人，勢要在飲食業分一杯羹。
如果有大學證書 條路可能完全不一樣
人前他們是成功創業例子，Alan回想，「如果當時我選擇了繼續讀大學，可能條路會好唔同，可能我已經在一間大公司工作，就係因為我冇大學證書，變咗唯一出路就係自己工作。」