可免則免的語言天敵組合（上）
撰文：可惜我是語言控
出版：更新：
好多人問過我可否同時學兩種語言，嗱，咁要睇你有無揀中「天敵組合」喇。首先，你個腦唔係電腦，兩種語言同時搶僅餘記憶體，嚴格來講係敵人。
有些人會因此而選擇同－時－開－始－學習兩種相似的語言，自以為一石二鳥、一雞兩味，結果揀咗「天敵組合」，包括「形不似神似」的日文及韓文、「形似神不似」的泰文及阿拉伯文、「形似神似」的西班牙文及葡萄牙文等；Friend or Foe真的只差一線而已。
先說日韓文。由於兩者使用不同的文字符號，驟眼難以比較，但兩者在發音、文法上也類同。坊間有推行一年全日制密集式課程的語言學校，專門教日韓雙語，上晝日文、下晝韓文。聽起來非常理想，一年學會日、韓文好抵玩啫！但事實真的如此？
我曾插班入讀同類課程學日文4個月，每朝上堂4小時，當中有同學就是這樣「上日下韓」，但這些同學的出席率連一半也沒有！一個日文基本單詞，偶爾還會讀成韓文。會讀錯、會混淆，就是因為太似！以為相似便會鬆懈，但同中必有異，好多人都因為咁而中伏。我也不知看過多少人，恃着自己會看漢字，而忽略了日語的平假名和片假名；恃着自己英文好，便將法文字當英文字來讀。
至於同時學習完全不同語系、但外觀相近的「長符」── 驟眼睇一串串，難以拆解成個別字母的語言，如泰文及阿拉伯文，都是一件好捉蟲嘅事（日韓文啲符號真係相對地濕碎好多）。
呢個遊戲係將大佬放在第一局，到你打贏大佬，學好如何「畫符」後，意志可能已褪減一大半。再說，阿拉伯由右至左，泰文由左至右，要學呢啲不知向左走定向右走的「符系」語言，我真心建議施主放下貪念，執意學好一種先講。
如是者，形似神似的西班牙文與葡萄牙文就是絕對天敵。篇幅有限，下回分解！
記住，越似先越係天敵，越似先越唔好一齊學。語言之間，很多時都是false friends，一不留神，隨時變成敵人。
（本文純屬作者意見，不代表香港01立場。）