【沙角冬菇亭】清拆後建築廢料堆滿街　街坊斥領展：無理過居民

屹立沙角邨三十多年的熟食亭（俗稱冬菇亭）不敵時代巨輪，於2月尾正式清拆。惟清拆活動至今幾日，不但冬菇亭面目全非，連附近的行人路亦遭殃，放滿冬菇亭拆下的建築廢料，發泡膠碎滿天飛，鐵通、雪櫃堆在路旁，行人需行單車徑。有沙角邨居民批評：「佢（領展）就拆得方便，但冇理過居民！」

沙田沙角邨冬菇亭的清拆工作於2月21日正式展開，但沙田區議員陳兆陽發現工人將冬菇亭的建築廢料胡亂擺放，霸佔行人路。「鐵枝、木板等建築廢料霸晒成條行人路，仲要冇圍板圍住，街坊成日投訴好危險。」

《香港01》記者今日下午於現場所見，從冬菇亭上拆下的建築廢料例如鐵架、鐵通、木板等，甚至有大型電器例如雪櫃，被隨便棄置於行人路上，霸佔整條行人通道，市民要使用單車徑。現場雖有幾個鐵馬圍着建築廢料，但零零散散，形同虛設，不少長鐵枝穿過鐵馬，甚至伸出馬路，相當危險。該路段人流頗多，行人走過都顯得特別小心翼翼。

街坊李小姐接受《香港01》訪問時表示，現場地上有玻璃、鐵釘，十分危險，有可能刺傷途人，認為這些建築廢料應搬上垃圾斗。「發泡膠嗰啲周圍飄，好影響環境，尤其是老人家氣管唔好。應該要有工作人員喺度指引安全，行唔到嘅路叫人唔好行。清拆唔係大晒，都要注意安全。佢（領展）就拆得方便，但冇理過居民。」

另一街坊黎小姐指，「依加咁樣好影響出入，又污糟，空氣都差咗好多。啲嘢又冇圍欄圍住，危險咗少少。呢個情況已經持續咗一個星期左右，希望佢快啲搞掂！」

陳兆陽表示，就有關情況曾向領展投訴。「佢哋回覆話今日（28日）會完成整個清拆工作，但我認為情況並唔樂觀，因為見佢仲有2、3成未拆，就算拆晒，清走呢堆建築廢料都要兩三日時間。」據悉領展或會在今晚通宵清拆，陳兆陽擔心會引發噪音問題。

領展發言人回覆《香港01》查詢指，事件為商戶進行的工程，據了解，商戶正從速進行有關清理工作，又表示商場辦事處已多次提醒商戶妥善處理相關物料。環保署回覆指，署方在2月28日收到沙田區議員向領展管理公司投訴有關沙角邨大排檔清拆工程造成環境衛生的信件副本後，已隨即派員到現場跟進事件。