【社區人．訪】甘心做20年「筆友」　鋼筆迷：睇筆跡已估到邊支筆

「只要睇個筆跡，已經可以估到用邊支筆寫！」以上並非筆跡專家的說話，而是出自鋼筆收藏家卓志達（Simon）之口。在Simon的眼中，鋼筆不單只是書寫工具，更加是工藝的表現，「無論筆桿設計、筆尖造工，甚至用料，都可以各有特色。」20年的「筆友」，感情絕對深厚。

鋼筆，又稱墨水筆，其起源可追溯至「點墨」的羽毛筆。而要追尋Simon的「筆友之路」，就要回到20年前，「當年鋼筆仍被視作書寫工具，但今時今日書寫的機會，比往日少好多，令鋼筆逐漸變成收藏玩意。20年前，香港都好少有關鋼筆資訊及買賣，最初玩鋼筆時，主要靠上網去外國拍賣網站睇，當時上網速度只有56K，亦都無數碼相，好多時只得文字介紹，就已經扑鎚買，經常出現畀錢無貨收的情況。」但Simon堅決不肯透露損失的金額，「幾百到一千啦，但當然唔止一次。」

就算多次被騙，Simon依然甘心做一個忠實的「筆友」，「不同年代的鋼筆，設計、上墨方式、材質都不同，有時買回來，試一試寫，已經心滿意足。」其實，鋼筆迷人的地方，不只於鋼筆，就連墨水都有不同種類，「墨水配合不同質地的紙張，又產生不同的顏色。就算筆尖都有好多種變化，加上書寫時的筆觸感覺，都是令人愛上鋼筆的原因。」訪問當日，Simon帶來數十支珍藏，但問到家中的藏量時，Simon每次都笑著迴避，「好耐無數過喇。」

雖然，至今香港有關鋼筆的資訊，獲取途徑已比早年多，但對比外國，仍屬小眾。而 Facebook群組「鋼筆﹑自動鉛筆情報局(香港)」，就聚集了一班鋼筆愛好者，除了Simon外，還有陳建偉（Felix），「儲了鋼筆只有兩年時間，上網買嘢時見鋼筆幾得意，結果睇睇吓就上癮。」而Felix的揀筆原則，以材料為先，「例如塑膠、銅、純銀、硬橡膠等，唔同材料拎上手，都有唔同感覺。」

其次，Felix亦最注意筆尖，「筆尖嘅粗幼度及打磨方式，都會影響書寫感覺。」對被譽為「漢字書法神器」的日本鋼筆長刀研，Felix尤其鍾愛，「長刀研以打磨長刀的工藝，用來打磨筆尖，並且分有不同粗幼度及層數，容易寫出『鐵劃銀鉤』的中文字。」