琅琊啟示錄：超低收只因無TVB劇集兩個特點

「 江左梅郎，麒麟之子，得之得天下」係電視劇《琅琊榜》裏面嘅一個江湖傳言，梅長蘇所發揮嘅威力，喺故事裏面當然利害。
而喺現實世界，《琅琊榜》亦成為大陸炙手可熱嘅劇集，仲紅到去韓國。
偏偏嚟到香港，就創咗無綫黃金時段嘅最低平均收視紀錄，上個星期三收視跌到落16.2點。對比起2014年無綫播放嘅《西遊記》，被圍插佢「膠」之下，都可以守住20點收視關口。
到底《琅琊榜》出咗咩事呢？

2015年9月喺大陸首播，《琅琊榜》點擊次數超過 101.8 億，照數字睇就點都唔似只得 16 點收視。大台回應話，套劇「人物背景錯綜複雜，觀眾錯失收睇一、兩集，就好難追上劇情發展，較難投入」。我就有睇開大台版本嘅，真係會唔睇半集，就錯過咗好多嘢而跟唔切。從呢個 point 去睇，大台無講錯。（其餘仲有兩個理由，第一就係佢哋講到口臭嘅星期三跑夜馬啲收視走咗去J2。另一個理由就有啲創意，話觀眾鍾意睇無綫自家製節目。咁就梗係啦大佬，你諗住拎實個免費電視牌照，但淨係做轉播台呀？）

我想話，大台今次真係買錯劇喇！雖然佢已經好醒咁唔買有文化異差嘅時裝劇，而係買古裝劇，但係對於無綫大部分觀眾，呢套劇真係太深奧。梅長蘇嘅計謀，十之八九都唔會立即交代來龍去脈，而係要觀眾同其他劇中人一樣，去等去睇，慢慢去估。觀眾有時估到、有時估佢唔到，就係套劇最吸引人去睇嘅地方。不過好可惜，呢個絕對唔係大部分睇開無綫嘅觀眾所習慣嘅劇集模式。

咁點先算係佢哋習慣嘅模式呢？就係要有以下兩個特點嘞。

第一個特點，就係miss咗一集，都可以估得中晒啲情節嘅。

除咗因為節奏慢，你 miss 咗嗰集根本無重要嘢發生過之外，仲可能係因為你係資深無綫觀眾，已經捉到佢嘅編劇套路，心意已通。播第一集，你大概都估到個結局係乜，劇情推進自然走唔出你手指罅。

用呢個條件去揀外購劇，揀中嘅機會真係千載難逢。畢竟無綫嘅編劇套路，係接近 50 年嚟綜合而成嘅形態，要飲無綫奶大嘅編劇先可能有呢個意識。何況買劇就係想買啲自己無嘅嘢，如果買啲自己做到嘅嘢，不如自己拍。

所以買劇嘅重點，喺第二個特點度。

要無綫嘅觀眾受落，你要買「廣播劇式電視劇」。

即係點呢？你可以搵大台2030播緊嘅《純熟意外》做個實驗。試下唔好望個畫面、齋聽，你都可以明白晒個劇講咩，放去電台度播，我覺得都無問題。呢啲就係上次陳維冠監製回應《殭》收視低時所講嘅「喺廚房聽劇情就可以知講乜」嘅劇集喇。

例如女主角個樣已經嬲到出煙，男主角都會走去問佢：

「你唔開心呀，係咪我激親你呀？」

男主角行埋個雪櫃搵嘢食之前就會同空氣講：

「做咗一日嘢，忙到晏都無食，好肚餓呀。」

只用對白、唔用畫面去交代推進劇情，自然齋聽都可以明白晒故事情節啦。

我唔係話用呢個模式寫嘅劇就一定係差呀。呢個只係模式，套劇好唔好睇，要講內容質素。台劇、韓劇都成日用呢個模式，拍主角個大頭做表情，再配返主角自己嘅旁白去交代。《我可能不會愛你》、《來自星星的你》都係咁做，都可以好好睇。大台如果要保住個收視，就要買呢類劇。《武媚娘》就係咁囉，都一樣係對白主導，但係製作精細、故事流暢就會好睇。而文章開始時提到嘅《西遊記》雖然係膠係肉酸，但勝在佢係一個大家都識嘅故事，大台傳統觀眾睇得明，就會繼續開住部電視機睇落去，呢啲就係所謂嘅「慣性收視」，而今次就證明咗呢啲慣性收視絕非鐵票嚟，係會流失嘅。

之但係，免費電視台身為一個流行文化嘅橋頭堡，推動觀眾進步係佢哋嘅道德責任，識得透過睇畫面、睇布局去了解故事，我覺得係 upgrade 嚟。經過今次「琅琊榜破低價」一役之後，呢個推動進步嘅責任，應該會落喺新台ViuTV身上。

其實新台已經做緊嘢，好似依家後勁凌厲，喺年輕觀眾當中討論度愈來愈高嘅《瑪嘉烈與大衛 綠豆》咁，用畫面交代劇情嘅方法雖然唔係佔大部分，但好多時已經撇開咗「我阿媽係女人」式嘅對白。佢受年輕觀眾歡迎，唔只係因為會將時事融入對白「貼地」咁簡單，仲因為佢用一個新嘅模式去做電視劇，呢個先係餓咗好耐電視嘅人覺得欣慰嘅地方。

（本文純屬作者意見，不代表香港01立場。）