【環遊世界．北美洲】紐約——處處都是電影影子
New York為無數電影取景地點，黃色的士、地下突如其來噴出煙霧、街頭food truck都好熟悉。周星馳係《喜劇之王》講過臨時演員都係演員，作為旅者亦算做過New Yorker。要講NY確係不知如何說起，紐約實在太多元化，以建築貫穿可以，以民族聚居探討又得，以藝術欣賞為路線都無問題。
由機場坐鐵路入NY前好雀躍，真正轉到NY地鐵既時候，黑漆既月台，加上車廂未有清晰指引的鐵路路線圖，偶爾有一兩件垃圾係地下停留著。此情此景，心入面只好叫自己保持樂觀。街上行人非電影《The Devil Wears Prada》中，個個好似模特兒甘喺摩天大廈穿梭，反之New Yorker散發出平易近人既感覺。一次係soho遇到一個攝影師擺街檔，見作品如此動人忍唔住上前搭訕，攝影師從來無諗過介紹其作品，反而介紹我地可以去邊玩，素未謀面的這一點甜讓人絲絲入扣。
習慣左紐約鐵路運作，加上買左7 day pass令我地走通Manhattan, Brooklyn同Queens。旅途中認識既New Yorker都會話地佢係嚟自「Brooklyn」或者「Midtown, Manhattan」又或者係「Long Island, New York」，Long Island 仲要讀作「Longailand」。我地理解以上述說或者好似香港人話自己住喺港島、九龍或新界咁。
如果只能夠揀一個地方再去的話，一定係Brooklyn Heights同Dumbo一帶。男女老幼、旅客及當地人都會聚集一齊細看日落。他鄉約見移居紐約多年既親友，從而得知《秋天的童話》以紐約為拍攝背景，置身於Brooklyn Heights先明白點解紅姑搬去長島都要帶埋Brooklyn Bridge油畫。
Queens比起Manhattan同Brooklyn更有民居氣息，Queens Flushing一帶的Chinatown比起Manhattan Canal Street的Chinatown亦更為樸實。除去旅客元素，紐約的Chinatown唔多唔少都有少許香港街角味道。Manhattan Chinatown中的黃大仙廟，孔子大廈同埋華人心目中的匯豐銀行對我地嚟講亦都只係地標而已，身旁一位幾十年前已經縱橫美國的說故事者，才能為Chinatown套上一點情意結。
有時候去唔同城市旅行都會同人講去downtown，但原來downtown係嚟自lower Manhattan,紐約人心目中的downtown就係city centre。無論downtown定midtown，係lunch hour都唔少白領拎住沙律或者喺food truck買的飯盒坐喺水池邊或公共空間曬住太陽享受一下一個人既時刻，場面係墟冚過蘭桂坊夜晚。喺香港中環見過有白領坐係公園食沙律，曾經覺得有點落泊既感覺，但深想一層香港中環的沙律絕對不比紐約便宜，當紐約最低工資係150港幣一個鐘時，而香港人又可唔可以賺到紐約人既人工呢。
電影《The Secret Life of Walter Mitty》主角Mitty離開紐約亦離開自己既comfort zone，勇闖冰島、喜馬拉雅山脈追尋從來沒有走失的底片，最後發現底片就係身邊。紐約作為世界心臟，脈搏聲亦比較震盪。香港同為世界大都會，效率和獅子山精神其實同Mitty的鍥而不捨不相伯仲。不過生活的確迫人來，璀璨夜景背後是多少在辦公室OT的Hongkongee在作出「貢獻」。
（所有圖片由作者提供，本文純屬作者意見，不代表香港01立場。）