【專訪】林家棟渴望挑戰無意返無綫拍劇：30年都做鵪鶉你都悶啦

近幾年興「回巢拍劇」，黃秋生去年憑《梟雄》奪視帝，今年就有吳岱融於《巨輪2》狂鬧「臭X」上位，曾是TVB一線小生的林家棟，卻直言暫時無意重返公仔箱，大前提是轉投影圈十幾年才自覺紮根，不想再適應新環境，更甚是享受高難度角色，例如於新片《兇手還未睡》飾演雙性戀變態富二代，比起名作《茶是故鄉濃》的「鵪鶉仔」，來得更開心、過癮。
攝影：陳焯輝

林家棟於1987年參加無綫電視藝員訓練班第14期入行，九十年代中後期憑《樂壇插班生》、《大鬧廣昌隆》及《難兄難弟之神探李奇》等登上一線小生之位，後來的《茶是故鄉濃》及《酒是故鄉醇》已是臨近離巢的作品，當年那個深入民心的「鵪鶉仔」，十多年來都沒有倦鳥知返之意：「暫時都唔會，第一、時間上我配合唔到；第二、其實我依家先開始適應電影，如果返電視台監製套劇，我反而興趣更大。」

1995年開始拍戲，2001年正式轉戰大銀幕，《無間道》、《黑社會》、《葉問》，到今年的《樹大招風》，留下不少令人印象深刻的角色，提名過3次金像獎最佳男配角，2010年監製的《打擂台》拿下最佳電影，在家棟心目中才算適應影圈，他認為與其找熟悉的面孔去製造新鮮感，倒不如起用新人：「我唔覺得我返去能夠做到啲乜嘢，依家我開心在可以試新人，如果成就到的話，有更大滿足感。」再者公仔箱比大銀幕的尺度緊得多，倒模式的演出又怎比得上電影的自由？「演員最渴望就係挑戰自己，如果我30年都做鵪鶉，你都悶啦。」

如何留得住高潮

演員、監製，下一步順理成章是導演，家棟自言不敢執導筒，只因欠一個能與他製造高潮的拍檔：「你個劇本要有高潮，特別係第一次做導演更加要，我思考範圍下未有個非常非常高潮嘅劇本，我要依賴接收，好多導演希望同partner有火花撞到，大家都好高潮，我未有呢啲partner，靠自己就死得啦。」他舉例《兇手還未睡》的導演邱禮濤與編劇李敏，二人合作過N次，接下來還有3部作品即將面世，身旁的李敏笑言不敢自稱與導演是黃金組合：「識咗好多年，合作愉快囉。」

編劇晉身導演又是合理，問李敏有否考慮，她回應爽快：「我自己想做導演，（拍咩題材？）梗係女人題材啦，因為我依家好辛苦，寫完一些女性劇本，譬如愛情，交給男導演，原來他們的睇法完全唔同。」舉例說男朋友遲到，女朋友嬲他無聲無氣不懂令人擔心，但男人只會覺得道歉就可了事，與其費唇舌解釋，李敏有感：「不如我自己來吧？」

麵包與愛情的兩性角力

近年劇本產量多，李敏指自己有兩條「生產線」，一條叫「訂單線」，似名牌時裝的「Couture」（訂製服），電影公司高層或導演的概念是訂單，餘下時間留給由記者私自命名的「霸氣線」：「我去到呢個年紀，我鍾意做咩就做咩。」例如寫下《兇手還未睡》。戲中文詠珊（Janice Man）與林家棟及許志安的三角關係難分難解，劇情安排安仔是拯救JM的王子，但在李敏心目中，男人卻連當王子的膽量都不夠，未能肩負給予對方幸福快樂生活的責任，童話都是騙人的？

家棟反指社會逼男人要揹起頭家：「麵包與愛情，你點知道兩個人一齊以後冇麵包你食，我眼見好多前輩都係白手興家，唔好話麵包，乜cake都有得你食。」歸根究底是男女之間的信任程度偏低，李敏笑言開戲要找家棟當監製，相信這場兩性角力會延續下去。

拍港產片要有陣除

面對兩位資深電影人，少不免談本土，《打擂台》中泰迪羅賓一句「唔打就唔會輸，要打就一定要贏」儼如新一代香港精神，家棟卻謂不會強調本土，港產片的弱點在於慣性：「早十零、二十年，即係九十年代開始，大家都當咗純產業去做，就係計數，有卡士、穩陣、保本，久而久之觀眾會悶，即使有好強勁嘅組合又點樣呢？大家心中有數。」解讀本土是共鳴，他認為新晉導演做到這一點：「喺自己最熟悉嘅地方，散發到自己味道出來，觀眾睇香港電影都係，你要聞到陣『徐』，即係我睇法國戲，我要聞到法國陣『徐』先得，你無啦啦叫我去做路易十六都冇用，電影係需要文化認同。」

林家棟服裝（上身）：CLUB MONACO

林家棟化妝：Nichol Chau ＠ [elf]

林家棟髮型：Alex Chan ＠ projetz4／J.A.C.K. Timeless