【小Q】任達華演視障人士險仆倒：未試過拍一部戲咁不受控制

以導盲犬為主題的電影《小Q》今日（16日）舉行開鏡拜神儀式，任達華、梁詠琪、楊采妮、郭晉安、羅仲謙等一眾戲中主演都有出席。

在戲中飾演一名視障人士的任達華透露為求真實，拍攝時需要戴住一塊遮蓋超過八成視力的「眼膜」：「我拍嘅時候會戴住塊『眼膜』喺對眼度，令到我睇嘢都會好模糊，所以間中都會仆親吓！」他更直言這次拍攝簡直是不受控制：「我從來未試過拍一部戲係咁不可控制，每分每秒都係控制唔到，我自己又要掛住做戲，眼入面又有塊嘢令我睇唔到嘢。要同隻狗有互動同溝通先可以帶到我去啲地方。」

《小Q》改編自日本作家石黑謙吾的小說《再見了，可魯》，而日本早已在2003年拍攝了改編電影《導盲犬小Q》，亦是不少人心目中的經典作品。15年後翻拍香港版，會否擔心難以突破？任達華大讚日本版拍攝得非常動人，但亦對香港版有信心：「都係叫『小Q』，但係個故事就完全唔同，因為係發生喺香港。你知啦香港地少人多，樓梯又多天橋又多，拍上嚟比日本版會困難好多。（所以都唔擔心會被人比較？）好難，但係都會喺困難中成長！」他亦透露導演運用了長鏡頭的拍攝手法，而自己最長更拍了48個take。