【逆向誘拐】新光戲院晚晚7點半場力撐　導演︰這裡不止有大戲睇

電影《逆向誘拐》在上映第一周，已被排片問題嚴重影響入座，導演黃浩然更公開在社交平台鬧爆只有天地場，並以一句︰「我都有阿媽生」以示不滿。
不過人間總是有情，電影來到第二周，雖然場次銳減，但就有新光戲院（Super 3）繼續支持，每晚提供7點半這個黃金時段讓電影上畫。

《逆向誘拐》講述世代之爭，是一部送給年輕人的作品。（劇照）

對於新光戲院（Super 3）有這個安排，《香港01》致電導演黃浩然回應︰「好開心呀，有人肯俾一個睇戲的黃金時段我哋，這是最實質的支持。」不少人以為新光就只有大戲，其實上址早前已裝修過戲院部分，改名為Super 3，並會播映首輪電影，今個星期便正在上映《逆向誘拐》和韓片《再見。我的初戀》。

導演黃浩然曾就作品被安排作「天地場」上映，於facebook開火狂轟。（資料圖片）

導演坦言自己都是因為去謝票，才第一次去Super 3。「好多人唔知Super 3即是新光，更加會以為這裡只有大戲睇。其實間戲院裝修得好靚，入面啲座位仲好大好寬敞，闊到足足可以坐到兩個小朋友，前面仲可以伸直隻腳，放低個袋，好舒服。」希望一個少少的支持，能讓電影接觸到更多的觀眾。