韓國最新恐怖片媲美《瘋人院逐個捉》　觀眾睇到呼吸唔到？

早前韓國恐怖片《瘋人院逐個捉》爆紅，入場人次屢創新高，掀起一股鬼片熱潮。相隔數月，又有一套題材類近的作品面世，《속닥속닥》（台灣片名：《鬼戲語》、英文片名《The Whispering》、中文直譯：悄悄話）講述6名高中生結束大學聯考後，相約到荒廢已久兼鬧鬼的主題公園探險，結果如他們所願真的遇上亡靈。

《속닥속닥》上周五在韓國開畫，至今入場人次已突破150萬，觀眾評價呈一面倒狀態，是一面倒地差，絕大部分網民給予1粒星甚至零粒星的分數（5粒星為滿分），他們的評語亦相當抵死，其中一個「高汁」留言係：「睇睇吓想食麵包，就出去買嚟食，之後冇返入戲院」。

大學聯考失敗先係最恐怖
單睇預告，《속닥속닥》雖然算不上非常恐怖，但又未至於如觀眾所講悶到抽筋，至少場景夠氣氛，亦營造到鬼魂要來不來的緊張感，還有鬼爪伸出伸入，難怪引到咁多人入場。不過一入戲院就見真章，大部分觀眾的狠批劇情完全唔恐怖、主角演技十分幼稚，有人話電影開頭一班主角聲稱大學聯考失敗，已經係全套片最恐怖的畫面，可見群眾的憤怒。

點撃下圖睇埋其他劇照

其他網民留言亦創意十足，例如有人話睇到呼吸困難，並非因為太恐怖，而係劇情太無聊睇到個人鬱結；又有人話自己求其拍一部都仲好睇；另外有網民話戲院打手仲恐怖過電影入面嘅鬼魂。至於正面評價大部分同演員外貌有關，其中男主角金旻奎正是人氣韓劇《今生是第一次》的暖男配角，另外亦與女團CLC成員莊錠欣（Elkie）在韓劇《富家公子》飾演過情侶。