韓國鬼片《瘋人院逐個捉》有幾驚？　實景超恐怖觀眾嚇到一地爆谷

在韓國近期人氣最高的電影要數恐佈片《瘋人院逐個捉》（韓文片名：곤지암，直譯「昆池岩」），故事講述有個韓國KOL組團闖當地著名鬧鬼景點──昆池岩精神病院，揸住部GoPro影足全程，電影以第一身視覺拍攝，令觀眾如置身於現場般。香港已有片商發行這部電影，過多兩個禮拜就有得睇，但入場親身感受呢套戲有幾恐怖之前，不如先睇下韓國觀眾嘅觀後感。

隨著時代進步，要拍一套嚇到觀眾的恐怖片越來越難，近年流行玩現場感的第一身實景拍攝手法，當中最為人所熟悉是10年前的《80分鐘死亡直播》（[Rec]），以200萬美元（約1560萬港元）成本刀仔鋸大樹，斬獲逾2.5億港元片房。去年內地亦有一套低成本《中邪》，講幾個朋友去鬧鬼農村探險，殺入康城電影節而聲名大噪。

輪到韓國都拍返套手法類似的《瘋人院逐個捉》，於世界七大恐怖場所光州昆池岩精神病院取景，由於是低成本製作兼素人演員擔正演出，故上映前話題性甚低，但開畫首天好評如排山倒海而來，大部分觀眾話似跟住主角行入鬼屋，齊齊嚇破膽，社交網站上一些反應都幾好笑，例如有人話要戴定太陽眼鏡入場，有嘢隔一隔會冇咁驚；有人就話驚到幾乎全程遮住對眼，搞到眼鏡印滿手指模，用1萬3000圜買飛，只係睇咗3000圜嘅內容；另有大批網民不約而同話散場時一地都係爆谷，估計有觀眾受驚過度，成兜爆谷倒落地下；亦有觀眾一支公入場，驚到要捉實隔離位陌生人隻手，咦？呢招用嚟識女仔都唔錯…

點擊圖片睇昆池岩精神病院實景，唔講仲以為係海洋公園嘅鬼屋…

愈驚就愈唔敢睇，愈唔敢睇反而就愈想睇，結果《瘋人院逐個捉》於南韓上映5日已經衝破100萬入場人次，揮低同期上映的大製作《挑戰者1號》（Ready Player One），仲刷新南韓恐怖片近10年來最快破百萬人次入場的紀錄。所謂「橋唔怕舊、最緊要受」，雖然呢一招玩過好多似，但套用在第二個地方上，又製造出另一番恐怖感，取材滿足到觀眾的獵奇心態之餘，人傳人好評價令其他人未入場都驚到面青，當然票房口碑雙收。