【康城影展】大星行得　大媽又行得　到底行康城紅地氈有咩準則？

第71屆康城電影節於日前開幕，而開幕第一壇盛事就係行紅地氈。每年各大小明星都出盡法寶在這個時刻爭艷，而近年更眼見流入不少不知名的大媽大姨，拖慢節奏行，亂賣性感，但問到為哪出電影出席時，又之吾以對，到底要踏上這個國際級的聖地，需要具備咩條件呢？

有留意昨日康城開幕，都見到有位內地大媽於紅地氈上谷胸，兼跌低搏搶鏡。雖然說她都算是半個藝人，但跟今屆參展的作品又零關係。到底作為一個國際影壇盛事之地，點解又容許有咁多閒雜人等入場呢？

就住呢個現象，《香港01》訪問了有多年參與康城影展經驗，百老匯電影中心總監麥聖希（Gary）。他坦言近年的確愈來愈多人行紅地氈，近年固然多了批內地不知名藝人，但昔日都有不少法國當地四五線明星，都會搏大霧出席。

能夠輕易入場，全因紅地氈門券易買過黃子華飛。Gary︰「因為那些門票很多地方可以拿到，只要你是電影工業內人員，都會有門路拎到。」除了循正常渠道得到，原來呢種入場券都有得炒！Gary︰「據我所知，的確有人會將這張入場券，當黃牛飛去賣，原因是門券沒有姓名登記，大會不會核對資料，更不需要證明你跟某套電影有關才讓你進場，是相當寬鬆的，而大部分人更是行完紅地氈就走。」可以話全程認飛唔認人，有飛就可以行紅氈。