【康城影展2018】范冰冰七度現身紅地氈　眼利網友發現P圖痕跡

又到一年一度影壇盛事，第71屆康城影展正式開幕，各地影星先後飛抵當地作準備，范冰冰亦都第7次踏上康城紅地氈，為有份參演嘅荷里活電影《355》宣傳，不過由抵埗到去紅地氈上，都發生一啲令冰冰頗為滴汗嘅事。

范冰冰一身休閒打扮，自己推住行李現身法國機場準備出席康城影展，戴住白色頭帶、附有長鍊嘅太陽眼鏡，白TEE牛仔褲長身西裝褸配以黑色高跟鞋，同一貫具氣勢打扮有唔同感覺。見到唔少FANS到場接機冰冰都好親民逐一簽名，點知尷尬嘅事發生啦，其中一位外國粉絲遞上靚相拎簽名，不過相中人就唔係范冰冰而係李冰冰，可以見到一直狂簽嘅范冰冰望一望然後定格，拎筆隻手慢慢移開繼續幫其他FANS簽名，睇嚟喺外國人眼中依然係︰「點指冰冰點睇都分不清」。

離開機場去到行紅地氈，范冰冰換上一條Ali Karoui高級訂製嘅粉綠色蛋糕裙，相當搶眼。作為紅地氈常客范冰冰熟練地轉換POSE俾現場記者影相，不過眼利嘅網友就發現，冰冰自家工作室發嘅靚相，對比媒體照片來說，手臂位好似有重點修圖，雖然未發生背景P圖P到歪咗嘅問題，不過藝人PO相前要美圖應該是常識吧。