【比得兔】配音都要方法演技　James Corden為入戲訓足10日兔籠

著名童話《比得兔》（Peter Rabbit）被改編成電影登上大銀幕，這隻有過百年歷史的兔仔與觀眾共渡復活節。有別於童話中的可愛溫馴形象，電影中的比得兔是個反斗又精靈的角色，為保家園與真人男主角大鬥法，而為比得兔配音的英國名嘴James Corden為求更入戲，自稱用上「方法演技」──在兔籠住足10日，仲仲餐餐食紅蘿蔔同生菜，係真唔係呀？

「我好似兔仔咁生活咗10日，喺街上面擺個鐵籠訓覺，日日蘿蔔同生菜當飯食。我仲整埋容，剛剛先埋晒口咋，做啲嘢都係為咗演好呢隻兔仔。」講到咁，James擺到明係吹水，不過他就話即使出盡力聲演好比得兔，他的4名子女仍不太欣賞：「我以為今次配音係天下間最有型嘅事，點知佢哋嘅反應係：『Yeah，是但啦，係囉』。」

比得兔的粵語版配音就由森美負責，仲有第一次配音的陳豪聲演比得兔隻肥兔朋友「賓仔」，森美話計外型應該同陳豪交換角色，因為比得較賓仔靚仔。雖然森美並非好似James Corden要用上方法演技，但他亦有獨特的入戲方法，就係穿上兔毛造的衫褲，配音時亦會戴住兔尾巴，都幾搞笑。