【票房速報】黎明陳奕迅人氣變唔到票房　2新戲5日合收100萬都冇

因為自製明福俠角色，令個人人氣大升的黎明，成為網絡最強勁的KOL。至於陳奕迅（Eason），大家都恨睇佢唱歌，叱咤與林海峰的演出片段，火速在網絡洗版。
不過兩位的人氣似乎唔係好帶到落電影票房處，兩位剛好在上星期四（18/1）都有新戲上，分別是《臥底巨星》及《搶紅》，好可惜兩片票房都相當不濟，上畫5日合共都收唔到過百萬，跟兩位演唱會票房比真係差天共地。

上星期，韓片《與神同行》繼續橫行不停報捷，單單一星期內，已經連番衝破2,000及2,500萬大關，可喜可賀。而夠膽「與神同行」的就有兩套華語電影，黎明自導自演的《搶紅》以及陳奕迅向香港動作喜劇致敬的《臥底巨星》。

不過「與神」為敵都真係冇乜好日子過，先講呢位阿臣！由陳奕迅、李榮浩主演，谷德昭執導的《臥底巨星》，以港式喜劇做賣點，加上阮大勇老師畫的海報，好有80、90年代傳統喜劇風味。好可惜開畫日僅收$117,382，情況並不樂觀。至於黎明自導自演的《搶紅》，戲名似要爭下爭下，不過戲飛就唔使點爭，首日只演18場次，收$44,947。

過埋周末、日，兩片票房都未見起色，計及星期一共5日數，《臥底巨星》收$402,228，至於《搶紅》，捱下捱下終於捱到6位數字，報$106,888。看來一眾黎太都要再發下力先得喎！

香港人要宏觀，要北望神州，票房這回事，點可以咁局限只睇香港，一齊望望內地數字。《搶紅》早在上年5月上畫，口碑好一般，結果收報1,625萬人民幣，不少意見都話黎明演出太少，劇情又有點混亂。至於《臥底巨星》，截止今日中午，上映12日收報3,891萬人民幣，都係好一般。似乎兩位的人氣未能兌換成票房，或者大家都係醉心兩位唱歌多啲。