【陰陽路20周年】一代鬼王雷宇揚 撞鬼司機爆粗神棍入型入格
撰文：許育民
出版：更新：
提起《陰陽路》，除了立即想起港產鬼片經典外，一眾角色都好深入民心，好似差不多集集都要慘死的古天樂，神出鬼沒的龍婆等，所以去到今年20周年版的《常在你左右》，都有呢兩位台柱坐鎮。
不過同樣因《陰陽路》系列而聲名大噪的仲有鬼王雷宇揚，可惜今次因檔期問題未能演出。事實上，他的演出顛覆了鬼片唔一定得個驚字，仲可以好好笑，在整個系列中，演出過倒霉的士司機、專呃人錢打齋的喃嘸昌、仲有電台節目主持同埋睇落流流地，但原來勁有料的驅鬼大師大粒癦，而佢獨門秘方原來係爆粗！
驅鬼大師大粒癦
《陰陽路》系列，由第一集開始似乎已定了固有格局。首先會由四個獨立故事串連，其中古天樂與雷宇揚就會穿插當中，前者扮鬼，後者就如一個節目主持，有時用第三者身份旁觀事件經過，有時就會以當事人體驗鬼怪事。
要數最抵死好睇，必選第一集《紅噹噹》一節，他看似冇料到得把口猛吹自己有幾掂，聲稱自己榮獲「1992年都市閒情舉辦的風水堪輿學答問大會冠軍人物身光頸靚Mission Impossible的大！粒！癦！」又話幫過湯告魯斯捉鬼，冇句真。但去到鬧鬼現場，又真係俾佢成功以粗口幫麥家琪趕鬼，似乎唔係得個吹字。成段對白密集多字但佢都讀得流利非常，非常抵死。更厲害是他拍完《陰陽路》後，觀眾都覺得佢有料，仲去埋電台主持靈異節目，遭遇同大粒癦有少少類同。
自我介紹篇
爆粗驅鬼篇
撞鬼司機被鬼呃
不過鬼王都有失威時，去到第三集的《升棺發財》，佢飾演一位倒霉的士司機，一開工就遇到全身白衫的關寶慧話要車佢去殯儀館，到達時就拎張面值5000萬的陰司紙俾佢找，雷宇揚以為自己中招，照找俾佢，事後當然知上當。不過呢幕又正正發揮到鬼王都有騰雞一面，都幾人性。
的士司機篇
《陰陽路》系列全19集封面
+14