【陰陽路20周年】新版《常在你左右》古天樂羅蘭坐鎮 雷宇揚冇影
堪稱香港電影屆奇葩的《陰陽路》系列，由起初屬小本製作，不被睇好的港產片，到首集上畫大收近600萬，於是立即火速拍續集，拍到欲罷不能直至第19集先肯收手。
整個系列橫跨7年光景，即係平均一年要拍2.7部，除了開首幾集的班底較固定外，往後的演員、導演等崗位都切換過不少個，而當中亦有好幾位演員的演出是令大家印象難忘，你又記得幾多個？
「頭七」男主角古天樂
大吉利是！咩頭七，其實係講緊古生原來係《陰陽路》系列中，頭七集的第一男主角，而事實上該系列頭七集仍然用菲林拍攝，隨後的就改以更低成本的數碼拍攝，而往後古生都大紅大紫，無再參與拍攝。講番頭七集，雖則是男主角，但佢差不多每集都要死一次，而且死法多元化，有被鬼索命有自焚，仲有好似第一集咁，無解釋點死，總之就一夜之間變成鬼，隨後就神出鬼沒，在成套戲左穿右插出現。
龍婆原名畢氏龍娣
羅蘭都是《陰陽路》的中堅，第一集已經以鬼魂身份頻頻出現，幾個鏡頭都驚嚇十足。不過當時羅蘭都未有角色名，都只係叫佢做垃圾婆。由於往後的集數羅蘭都以不同身份現身，直至中段的集數，更有了畢氏龍娣這個角色名，漸漸就演變成往後的龍婆。角色之經典，更令羅蘭可以龍婆身份做女主角拍外傳，好似有《七月十三之龍婆》，同埋《四月四日》等，好吃得開。
節目主持鬼王雷宇揚
《陰陽路》第一集，以四個故事串連，而當中雷宇揚就充當主持一角，左右穿插，既會以第三者身份旁觀事件發生，又會以當事人經歷鬼怪事。雷宇揚在戲中角色亦相當神奇，經常口沒遮攔話自己幾勁，吹水話自己幫湯告魯斯捉鬼，似足神棍，但去到重要關頭，佢又真係交到貨喎！。在第一集《紅噹噹》一節，佢就以粗口成功幫麥家琪驅鬼，所以其功力可謂深不見底，不過在某些集數內又的的確確是活演緊一名神棍。雷宇揚是該系列的靈魂之一，每次出場都必定有笑料，而且極其順口的對白，令大家會有種等佢出場的期待。
《千藥有酲》男主角志雄哥
志雄哥是90年代黑社會電影不可或缺的人物，但你點估到佢演搞笑角色都有一手。在《陰陽路》系列中，就一反大佬氣派，不時演騰雞冇料到的角色。在第一集就飾演一名演員，同苑瓊丹拍了一部《千藥有酲》，惡搞劉德華套《天若有情》。正正就在自己買飛入戲欣賞時，坐錯「陀地位」（留給鬼魂坐的座位）而撞邪。隨後志雄哥都有穿插其他集數，並保持其抵死搞笑風格。
重溫《陰陽路》系列，你喺電影台睇過幾多套？
20年後加重戲碼
電影來到今年剛好20周年，在古天樂和導演邱禮濤牽頭下，上年已開鏡拍下全新一集《常在你左右》作為紀念，並於10月26日上畫。新版沒有以《陰陽路》掛帥，但故事形式依然是由四個小故事合而為一，新一集更加重人腳，新添幾位重量級演員，包括張智霖、蔡卓妍、佘詩曼及影帝林家棟，至於舊有的古天樂、羅蘭就真係常在你左右，依然坐鎮。不過大家都愛看的畢彼特（雷宇揚 飾）及志雄哥，就因檔期問題未能參與，有點可惜。